Беларусдан гапирамиз! Бугун ҳамюртларимизни муҳим ўйинлар кутиб турибди

Жасур Яхшибоев, Шаҳбоз Умаров ҳамда Ҳумоюнмирзо Иминов ҳаракат қилаётган жамоалар учун чемпионат ўйинлари ўзининг энг қизғин палласига кириб бормоқда. Бугун улар Беларусь Олий лигаси 29-туридан ўрин олган учрашувларда иштирок этади.

"Шахтёр" турнир жадвалининг 8-поғонасини банд этган "Рух" Брест клуби майдонига сафар қилади. Улар олдида фақатгина 2 ўйин қолган ва шу учрашувларнинг барчасида ғалаба қозониш эвазига "кончилар" пешқадамга айланиб олиши мумкин. Яхшибоев жамоаси 1-ўриндаги БАТЭнинг очко йўқотишини ҳам кутишга мажбур.

Шунингдек, Шаҳбоз Умаров ва Ҳумоюнмирзо Иминов шарафини ҳимоя қилаётган "Энергетик - БГУ" клуби Минскдан ташриф буюрадиган "Динамо"ни меҳмон қилади. Ўйин олдидан майдон эгалари 38 очко тўплаган ҳолда, турнир жадвалининг 9-поғонасини банд қилиб турибди.

Барча учрашувлар Тошкент вақти билан 16:00 да старт олади.