Беларусда бомбардирлар баҳси. Яхшибоев бугун гол уриши шарт!
- 7-июн 2020, 18:01
- Zohir Toshxo’jayev
- 0
- Футбол
Беларусь чемпионатида 12-тур ўйинлари давом эттирилади. Бугунги учрашувларнинг аҳамиятли томони шундаки, мусобақа тўпурарлари баҳсида етакчилик қилаётган футболчилар майдонга тушади.
Ҳамюртларимиз Жасур Яхшибоев ҳамда Шаҳбоз Умаров фаолият олиб борадиган "Энергетик-БГУ"нинг сафарда "Шахтёр" Солигорск жамоасига қарши ўтказадиган учрашуви турнинг марказий ўйини бўлади. Бу учрашувда Жасур голлари сонини ошириши кутилмоқда. Ўзбек легионери ҳисобида ҳозирча 7 та гол бор ва у Гегам Кадимян билан бирга бомбардирлар баҳсини бошқармоқда.
Ўз навбатида, мезбонлар сафидаги тўпурар Виталий Лисакович ҳам Яхшибоевга етиб олишга ҳаракат қилади. 11 та ўйинда майдонга тушган футболчи бешта голга муаллифлик қилган.
Жасур Яхшибоевнинг асосий рақобатчиси Гегам Кадимяннинг жамоаси “Неман” бу турда сафар учрашувида “Славия” устидан 3:1 ҳисобида зафар қучди. Тўлиқ ўйнаган Гегам майдонни голсиз тарк этди. Бугун Жасурда Кадимяндан ўзиб кетиш имконияти бор.
Шунингдек, 12-турда ўзаро куч синашадиган “Витебск” ва “БАТЭ” ўртасидаги баҳс ҳам ўзбекистонлик футбол мухлисларини бефарқ қолдирмайди. Чунки мезбонлар мазкур учрашувда биринчи ўринда бораётган “БАТЭ”ни мағлуб этадиган бўлса, “Энергетик-БГУ”да пешқадамга тенглашиб олиш учун қулай вазият юзага келади. Бунинг учун “талабалар” сафар учрашувида учинчи ўринни эгаллаб турган “Шахтёр”ни мағлубиятга учратиши керак.
Қолаверса, “Витебск” – “БАТЭ” ўйини Жасур Яхшибоев учун ҳам аҳамиятли. Чунки мезбонларнинг молдовалик легионери Ион Николаеску 8 та ўйинда бешта гол урган ва тўпурарлар баҳсида ўзбекистонлик ҳужумчини таъқиб қилмоқда.
“БАТЭ”нинг сербиялик ҳужумчиси Неманья Милич тўққизта ўйинда рақиблар дарвозасини беш маротаба ишғол қилган ҳолда тўпурарлик унвони учун курашга қўшилди.
“Шахтер” – “Энергетик-БГУ” учрашуви Тошкент вақти билан соат 22:00 да старт олади.