“Барса”, “Реал” ва “Сити” бир ҳужумчини талашяпти

Бильбаонинг “Атлетик” жамоаси ҳужумчиси Нико Уильямснинг ишлари юришиб кетди. Истеъдодли футболчи Европанинг гранд клублари орасидан ўзи истаганини танлаш имконига эга бўляпти.

Таниқли инсайдер Экрем Конурнинг маълум қилишича, испаниялик ҳужумчига ҳозирнинг ўзида тўрт жамоа жиддий қизиқиш билдирмоқда.

Нико Уильямс айни пайтда Ла Лига грандлари – “Барселона” ва “Реал”, Англия чемпиони “Манчестер Сити” ва таркибини кучайтиришга уринаётган “Астон Вилла” нишонида турибди.

21 ёшли футболчининг “Атлетик” билан шартномаси мавсум охирида якунланади. Харидорлар январь ойидаёқ футболчи билан музокарага киришиши мумкин. Истеъдодли ўйинчининг янги жамоага эркин агент сифатида бепул қўшилиш имконияти унинг харидорларини янада кўпайишига олиб келади.