Арне Слот: "Ўтган мавсумга нисбатан янада яхшироқ бўлишимиз лозим, сабаби рақиблар кучайган"

"Ливерпуль" бош мураббийи Арне Слот жамоанинг даражаси ва истиқболлари ҳақида фикр билдирди.

Ўтган мавсумда - нидерландиялик мураббийнинг Англиядаги дебютида "қизиллар" Премьер-лигада чемпионга айланди. Рақиблардан сезиларли устунликка эришганига қарамай, мураббий чемпионлик осон бўлмаганини ва бу мавсумда муваффақиятни такрорлаш янада қийинроқ бўлишини таъкидлади.

- Биз "Манчестер Сити" сингари чемпионликни осонликча қўлга киритмадик. Қаттиқ курашишга мажбур бўлдик. Энди биз ўсишимиз керак, ўтган мавсумга нисбатан янада яхшироқ бўлишимиз лозим, чунки рақиблар кучайган - рақобат янада жиддийроқ, - деди Слот матбуот анжуманида.

"Ливерпуль" кейинги турда асосий рақибларидан бири - "Арсенал" билан ўйнайди. Икки турдан сўнг ҳар икки жамоа ҳисобида олтитадан очко мавжуд.