"Андижон" мураббийи: "Бу кунни биз йил давомида кутдик"

“Андижон” – “Машъал” (4:2) ўртасидаги учрашувдан кейин ташкил қилинган матбуот анжуманининг иккинчи қисмида жамоамиз ёрдамчи мураббийи Олег Корниенко қатнашди.

- Дастлаб Андижон вилоятини, халқини бугунги муҳим ғалаба билан табриклайман. Бу кунни биз йил давомида кутиб яшадик ва мана шу кунга етиб келдик. Ҳаммаси учун мухлисларга, Андижон халқига раҳмат. Барчамизни яқинларимиз, қариндошларимиз ғалаба билан табриклашяпти. Ўйин биз учун асабий бошланди. 4:2 – бу мухлислар учун ёқимли ҳисоб деб ўйлайман. Бизда интрига кучли эди. Лекин шундай бўлса-да, ўзимизнинг хатоларимиз туфайли иккита гол ўтказиб юбордик. Жамоамиз характер кўрсата олди. Буни аввал ҳам айтганман ва ҳозир ҳам айта оламан. Яна бир бор ҳаммани ғалаба билан табриклайман. Шу билан бирга яна 3-4 та голли имкониятлардан ҳам фойдалана олмадик. Биринчи бўлимни ўзида ўша голларни уришимиз керак эди.

- Бутун Андижон халқи номидан жамоани ғалаба билан табриклаймиз. Бугун яхши ўйин бўлди. Аммо жамоа ўйинида индивидуал хатолар кўзга ташланди. Масалан, дарвозабон...

- Иккита ўйинда ҳам дарвозабонларимиз хатоликка йўл қўйди. Тўғри, энди ўртада қисқа танаффус бор ва улар хато ва камчиликларини тўғрилаб кейинги баҳсга шай ҳолатда бўладилар, деб ўйлайман. Албатта, бу вазиятларни биз мураббийлар штаби кўриб, таҳлил қилиб чиқамиз. Ушбу учрашувда ютишимиз керак эди, тамом. Бугун ғалаба қозонишимиз кераклигини, барча яхши тушуниб турганди. Асосийси, бугунги ўйинда ғалаба қозондик. Битта хато бўлди, аммо қолганлар унинг ўрнини босиб кетди. Ҳақиқий жамоа бўлиб шакллангандик. Бир-бирини майдонда ҳам қўллаб-қувватлашларини кўрсатишди. Характерли, ютишни яхши кўрадиган ва ютқазишни ёмон кўрадиган жамоага айландик. Бу якунда ўз натижасини кўрсатди. 90+4- дақиқагача тинмай ҳаракат қилдик ва бу ўз самарасини берди.

- Ўйинда асосий кўрсатмаларни сиз бериб турдингиз. Бош мураббий Виктор Кумиковнинг йўқлиги билинмадими?

- Албатта, бош мураббийсиз анча қийин бўлди. Нима ҳам дердик, яна битта ўйинда сабр қиламиз ва барчаси ўз ўрнига тушади. Бош мураббийнинг ўз ўрнида эмас, балки трибунадан туриб жой куйдириб турганини жамоа аъзолари жуда яхши ҳис қилиб турдилар. Шунга яраша етарлича ҳаракат қилишни ўзлари ҳам айтгандилар ва ўз сўзининг устидан чиқишди.   

“Андижон” матбуот хизмати.