"Андижон" футболчиси: "Бу жуда яхши ташаббус, ўйиндан кейин уларнинг шарҳини эшитсак маза қиламиз"

Про лига етакчиларидан бири “Андижон” 12 июнь куни ўз майдонида “Хоразм” билан баҳсга жиддий тайёрланмоқда.

Жамоа сафида яхши ўйинчилар жамланган бўлиб, уларнинг орасида Илҳом Алижонов ҳам бор. Иқтидорли ҳимоячи бўлажак учрашув олдидан бир қатор саволларга жавоб қайтарди.

- 12 июнь куни “Андижон”нинг ўз майдонида “Хоразм”га қарши ўйини бор. Бўлажак учрашувга тайёргарлик қандай кетмоқда?

- 7 июндан “Хоразм” билан ўйинга тайёргарлик кўряпмиз. Жамоамизда кайфият жуда юқори даражада. Анчадан бери ютқазмасдан келяпмиз. Фақат ўтган турда меҳмонда “Янгиер” билан дуранг ўйнаб қўйдик. Энди ўз майдонимизда ўйнаймиз. Билсангиз, биз ҳали ўз уйимизда мағлубиятга учраганимиз йўқ. Раҳбарият ва мухлисларимиз қаршисида ғалаба қозониш учун бор кучимизни берамиз, бунинг учун астойдил тайёргарлик кўряпмиз. Машғулотларда ҳам 100 фоиз эмас, 200 фоиз куч сарфлаб меҳнат қиляпмиз.

- Ўзингиз айтганингиздек, сафарда “Янгиер” билан баҳсда дуранг қайд этилди. Ўшанда ғалаба учун нима етишмади, деб ўйлайсиз?

- Ғалаба учун ҳисоб 0:0 бўлганидан кейин албатта гол етишмади. Бизда имкониятлар кўпроқ бўлди. Фақат фойдалана олмадик, биринчи сабаб шу. Иккинчи сабаби кун иссиқ бўлди. Балки бу баҳонадек туюлиши мумкин. Лекин иссиқ ҳавода унга мослашиб олгунча биринчи тайм тугаб қолди. Иккинчи бўлимда шошилдик ва шунинг эвазига хатолар бўлди.

- “Андижон” жамоаси ҳозирча ягона бўлиб турган мағлубиятини биринчи даврада айнан “Хоразм” майдонида қабул қилиб олганди. Шу боис мухлислар бу сафар ўша мағлубият учун реванш олишларини кутмоқда...

- Ҳа, чемпионат бошланганидан бери биринчи мағлубиятимиз “Хоразм” билан баҳсга тўғри келди. Ўшанда афсуски 3:0 ҳисобида ютқазиб қўйгандик. Эсимда, учрашувдан кейин қаттиқ танқидлар бўлганди. Ҳозирда жиддий тайёрланяпмиз. Мураббий ва футболчилар буни яхши ҳис қилиб туришибди. Реванш олишга бор кучимиз билан астойдил ҳаракат қиламиз. Мухлисларимизни ғалаба билан хурсанд қилиш асосий мақсадимиз.

- Шахсан ўзингиз “Хоразм” билан беллашувда қанақа ҳисоб кутяпсиз?

- Аслини олганда, бизга 1:0 ҳам ғалаба. Асосийси, ишончли тарзда ютсак бўлди. Футболчи шунақа, ҳисоб 1:0 бўладими, 3:0 ми ёки 3:1 ми, фарқи йўқ, биз ғалаба учун ҳаракат қиламиз. Қанақа натижа бўлиши Худодан. Биз меҳнат қилишда ҳаракат қиляпмиз. Албатта, иложи борича йирик ҳисобда ғалаба қозонишга интиламиз.

- “Андижон” – “Хоразм” учрашувига эътибор катта. Чунки мазкур тўқнашувни кўзга кўринган Хайрулла Ҳамидов билан Даврон Файзиев биргаликда бевосита стадионда шарҳлаши режалаштирилган. Бу ҳолат сиз футболчиларга қандай таъсир қилади?

- Ўзимиз ҳам ёшлигимиздан иккала инсоннинг шарҳларини эшитиб келганмиз, мухлиси бўлганмиз. Даврон ака Файзиев билан ёнма-ён ўтириб суҳбатлашганман. Яхши инсон. Хайрулла ака Ҳамидов ҳам худди шундай. Уларнинг шарҳлари одамни руҳиятини кўтаради, бу яхши. Учрашувга мана шундай томондан эътибор қаратилаётганини қўллаб-қувватлайман. Биз футболчиларнинг ҳам руҳиятимиз анча ошади. Масалан, ўйиндан кейинги тасвирни кўриб, уларнинг шарҳини эшитсак маза қиламиз. Бу жуда яхши ташаббус бўлди. Иккаласининг стадионда шарҳлашини эшитиб хурсанд бўлдик. Хайрулла Ҳамидов ва Даврон Файзиев қанча кўп шарҳласа ўйиннинг мақоми ва даражаси ҳам ошиб бораверади.

- Шунингдек, ашаддий мухлислар ҳам жамоани фаол қўллаб-қувватлашади ва шунга яраша табиийки фақат ғалаба кутишади. Бу сизларга қўшимча босим ўтказмайдими?

- Йўқ. Ўзимдан қиёс қилиб айтадиган бўлсам, майдонда бўлган пайтимда фақат ўйинга бор эътиборимни қаратаман. Турли гап-сўзларга қулоқ солмайман. Бизнинг жамоада босимга тушиб ҳаяжонланиб қоладиган футболчи йўқ. Ҳаммаси ўзига яраша тажрибали ва майдонда нима қилиши кераклигини биладилар. Мухлисларнинг қўллашидан куч олсак оламизки, асло босимга тушмаймиз. Ишқибоз ҳар қандай ҳолатда ҳам жамоасини ёлғизлатиб қўймаслиги керак. Биздаги ишқибозлар ана шундай, қаерда бўлса ҳам жамоани қўллаб-қувватлайди.

- Ўтган йили ярим йил про лигада “Янгиер” учун ҳам тўп сурдингиз. Кейин эса “Навбаҳор”да. Айтмоқчиманки, бу йил про лигада мана шундай кучли интрига бўлишини кутганмидингиз?

- Ўтган йили ҳам маълум вақт ўйнаб буни сезгандим. Бу йил эса Суперлигадан учта жамоа қўшилди. Шу боис янги мавсумда про лигада янада шиддат ошишини кутгандим. Мана, кутилган натижалар бўляпти. Ҳамма клуб ҳаракат қиляпти, кучли бешталикка киришга. Жамоалар очколари сонини кўпайтиришга интилишмоқда. Суперлигадан озгина фарқ қилади холос.

- Мавсум бошида олдингизда Суперлигада тўп суриш варианти ҳам бор эди. Аммо сиз про лигани танладингиз. Бу қарорингиз тўғрилигига қанчалик амин бўляпсиз?

- “Навбаҳор”да менда ўйин амалиёти камроқ бўлганди. Бу ерга келганимдан асло афсусланганим йўқ. Ҳаммаси яхши. Ўйин амалиётига ҳам эга бўляпман. Рағбатлантиришлар ҳам жуда яхши. Шароитлар Суперлига даражасида. Ҳатто, Суперлигада кўп клубларида ҳам бундай шароитлар йўқ. Футбол муҳитида ҳам, футболдан ташқари ҳолатда ҳам бу ерда муаммо кўзга ташланмаяпти.