Аморим: "Гарначо ва Санчо сотилмаса, клубга қайта келиб қўшилишади"

"Манчестер Юнайтед" бош мураббийи Рубен Аморимнинг маълум қилишича, Алехандро Гарначо ва Жейдон Санчонинг трансфери амалга ошмаса, улар жамоага қайтиб келади.

Аввалроқ Гарначо, Санчо, Антони ва Маласия клубнинг АҚШга бўлган ёзги сафаридан ташқарида қолдирилгани маълум бўлганди. Ҳар тўрт футболчининг клубни тарк этиши мумкинлиги ҳақида хабарлар тарқалганди.

"Ҳар бир футболчининг алоҳида сабаблари бор. Айримлар жамоада ўз ўрнини топиши учун янги жамоа излаши керак. Бошқалар эса аниқ қилиб янги чақириқларга тайёр эканини кўрсатмоқда. Шу сабабли, биз уларга қарор қабул қилиш учун вақт беряпмиз.

Агар улар жамоага қайтиши керак бўлса, қайтиб келишади — чунки улар ҳали ҳам бизнинг футболчиларимиз. Мен билишимча, Омар Беррарда ва Жейсон Уилкокс бу футболчиларнинг қиймати бўйича аниқ позицияга эга. Агар бу баҳоларга мос таклифлар бўлмаса, улар қолади. Бунисида ҳеч қандай шубҳа йўқ" - деди португалиялик мутахассис.

Аморим шунингдек, баъзи клублар охирги пайтгача кутиши мумкинлигини таъкидлади, аммо кутилмаган ҳолатлар ҳам юз бериши мумкинлигини қўшимча қилди:

"Мен футболчиларни қабул қилишга тайёрман" — дея таъриф бериб ўтди "қизил иблислар" бош мураббийи.