Алли футболчилик фаолиятини якунлаши мумкин

"Тоттенхэм"нинг собиқ юлдузи, Англия терма жамоасининг аъзоси Деле Алли фаолиятида яна бир тушкун босқичга келиб тушди. Британия матбуоти маълумотига кўра, 29 ёшли ярим ҳимоячи футболдан бутунлай кетиш ҳақида ўйлаб қолган.

Жорий йилнинг январь ойида у Италиянинг "Комо" клубига 18 ойлик шартнома асосида қўшилганди. Аммо у ерда ҳам барчаси режа бўйича кетмаяпти — янги мавсум арафасида у жамоанинг йиғин режаларига киритилмади.

Эслатиб ўтамиз, Алли март ойида А Сериядаги дебютида, "Сан-Сиро"да "Милан"га қарши баҳсда майдонга тушганди. Бу унинг икки йилдан кейинги илк расмий ўйини эди. Аммо у фақат 9 дақиқа ўйнаб улгурди — Рубен Лофтус-Чикка қарши қўпол ўйини учун VAR орқали қизил карточка олганди.

Бу воқеа "Комо" устози Сеск Фабрегаснинг ғазабига сабаб бўлди ва айнан шу ўйин англиялик футболчининг Италиядаги қисқа фаолиятида бурилиш нуқтаси бўлди. У кейинроқ жароҳатдан соғайиб сафга қайтган бўлса-да, Фабрегас уни янги мавсум учун асосий таркиб режаларига қўшмаган.

Бир пайтлар Европанинг энг иқтидорли ярим ҳимоячиларидан бири ҳисобланган Деле Аллининг профессионал фаолияти шубҳа остида турибди.