Алишер Никимбаев SFI Management Group «Пахтакор»га ҳомийлик қилишни тўхтатгани, клуб қайси ташкилот тасарруфига ўтгани борасида маълумот берди

Охирги вақтларда "Пахтакор" клуби ва унинг атрофидаги хабарлар тинмаяпти. Жамоа ҳомийси энди клубга пул ажратмаслиги борасида маълумотлар кўпайганди.

Таниқли мутахассис Алишер Никимбаев телеграмдаги саҳифасида ушбу ҳолатга аниқлик киритди.

- Шундай қилиб, SFI Management Group таркибидан чиққан "Пахтакор" ФКнинг 80 фоиз акциялари Тошкент шаҳар ҳокимиятига қайтариб берилди ва энди, 2017 йил апрель ойига қадар бўлгани каби, клуб тўлиқ шаҳар ҳокимлигига тегишли. Aммо, бу "Пахтакор" ФК шаҳар бюджети ҳисобидан молиялаштирилади, дегани эмас. Катта эҳтимол билан клубда ҳомийлик гуруҳи бўлади, улар клубга ғамхўрлик қилиш юкини ўз зиммаларига олишади.

Умуман олганда, "Пахтакор" билан содир бўлган воқеалар футбол клублари акциялари билан боғлиқ вазиятни қайта кўриб чиқишга сабаб бўлиши керак. "Пахтакор"нинг акциялари бўлган SFI Management Group акцияларини қайтаргач, клубни қийин аҳволда қолдирди. Ҳатто ОФК Чемпионлар Лигасида иштирок этиш учун ҳам клубда керакли маблаг йўқ эди ва раҳбарият кредит олишга мажбур бўлди. Aслида клубнинг беқарор молиявий аҳволи Чемпионлар Лигасидаги муваффақиятсизликка сабаб бўлган.

Кейинги сафар акциядор клубдаги улушидан воз кечмоқчи бўлса, ундан кетишдан олдин камида 6 ой давомида клуб харажатларини кафолатлашни талаб қилиши керак.

"Пахтакор"га келсак, энди вазият яқин келажакда ижобий томонга ўзгаришига умид бор, - деди Алишер Никимбаев.