"Аждарлар" "Бургутлар"ни қандай ожиз қолдирди?

“Бургутлар” бу турда Қаршида “Насаф” билан куч синашди. Олдиндан шуни айтиш лозимки, меҳмонлар ушбу беллашувга бир қатор йўқотишлар билан етиб келди. Жумладан, Игорь Литовка, Абдулвоҳид Ғуломов, Ислом Маматказин, Любиша Пецель каби футболчилар жароҳат олганликлари боис жамоага ёрдам бера олмаяптилар. Бош мураббий эса ихтиёридаги бор ўйинчилардан фойдаланмоқда. Шу куни “Андижон” таркибида 19 ёшли дарвозабон Максим Сарраф дебют ўйинини ўтказди.

“Насаф”га қарши баҳс аввалдан оғир ўтиши маълум эди. Боиси, бу жамоа ҳозирда турнир жадвалида пешқадамлик қилиб келаётганди. Лекин “Андижон” ҳам бу учрашувга астойдил тайёргарлик кўрган бўлиб, ўз режасига, ўйин стратегиясига эга эди. Бироқ кутилмаганда беллашувнинг 3-дақиқасида ўтказиб юборилган тезкор гол жамоа режаларини ўзгартириб юборди.

Ўйиндан кейинги матбуот анжуманида иккала жамоа устозлари ҳам айнан тезкор гол ўйин суръатини ўзгартириб юборганини алоҳида таъкидлаб ўтдилар. Ўйинда устунликка эришган майдон эгалари бўлим ўрталарида иккинчи голни ҳам киритдилар.

Бунга жавобан Хомяков шогирдлари вазиятни ўзгартириш ҳаракатида бўлдилар. Масалан, бир вазиятда Дамир Темировнинг жарима зарбасидан тепган кучли зарбасини “Насаф” посбони маҳорат кўрсатиб аранг қайтариб юборди. Иккинчи бўлимда ҳам жамоамизда имконият бор эди. Танаффусдан кейин ўйинда бурилиш қилиш учун мураббийлар ўзгаришларга қўл урдилар. Ҳужумларнинг бирида Абдураҳмон Комиловнниг жарима майдони ташқарисидан йўллаган зарбасини Неъматов қийинчилик билан қайтарди. Бироқ қайтган тўпга биринчи етиб келган Лука Згурский жуда қулай вазиятдан фойдалана олмади. У яқин масофадан тўпни шошилганча юқорига тепиб юборди. Балки гол бўлганида ўйин суръати ўзгарган бўларди. “Насаф” эса иккинчи бўлим ўрталарида ҳисобни йириклаштирди ва ўйинга нуқта қўйди.

Ҳар доим мағлубиятга учраш оғир ва аламли. Афсуски, бу сафар ҳам “Андижон” мана шундай ҳолатни бошидан кечирди. Олдинда эса жамоани 30 август куни Ўзбекистон Кубоги ярим финал доирасида “Бобур арена”да “Сурхон”га қарши жуда муҳим ўйин кутмоқда. Энди бор эътибор ушбу ўйинга қаратилади. Жамоа ўз тарихида янги саҳифа очиш арафасида турибди. 

“Насаф” – “Андижон” – 3:0 (2:0).

25 август. Қарши. “Марказий” стадион. 6282 томошабин.

Ҳакамлар: Аскер Нажафалиев, Александр Сидоров, Амир Галеев.

Захира ҳаками: Никита Мустафин

ВАР: Рустам Лутфуллин

АВАР: Алишер Усмонов

Назоратчи: Марат Исмоилов

Комиссар: Қудрат Мадраимов

“Насаф”: Абдувоҳид Неъматов, Игорь Голбан, Шерзод Насруллаев, Дилшод Комилов, Акмал Мозговой (Куач Юель 79), Жавоҳир Сидиқов (Марко Станоевич, 69), Зафармурод Абдираҳматов (Дониёр Нарзуллаев, 79, Жамбули Жигаури (Шароф Муҳитдинов, 69), Ойбек Бозоров, Бобур Абдиҳолиқов, Зоран Марушич (Мурод Раҳматов, 69).

“Андижон”: Максим Сарраф, Владимир Бубанья, Илдар Маматказин, Абдураҳмон Комилов, Сардор Азимов (Шахром Самиев, 79), Леван Арвеладзе (Абинур Нуримбет, 63), Дамир Темиров (Лука Згурский, 46), Вагиз Галиулин (Илҳом Абдуғаниев, 46), Муҳаммадкарим Тоиров, Фарҳод Соҳибжонов, Рустам Турдимуродов (Бектемир Абдуманнонов, 63).

Голлар: Жамбули Жигаури, 3 – 1:0. Зоран Марушич, 22 – 2:0. Зоран Марушич, 68 – 3:0.

Огоҳлантиришлар: Дилшод Комилов, 29. Бобур Абдиҳолиқов, 41. Шароф Муҳитдинов, 90+4 – Абдураҳмон Комилов, 43. Рустам Турдимуродов, 59.

Четлатиш: Бобур Абдиҳолиқов, 76.