2 та ўйинда урилган 9 та гол, 16 та карточка ва чемпион "Барселона" ёхуд Испания суперкубогидаги "эл-класико"!

Саудия Арабистонида бўлиб ўтаётган Испания суперкубоги ўз ниҳоясига етиш арафасида. "Реал" ва "Барселона" ўтказиладиган финал ўйинидан олдин ушбу турнирда бўлиб ўтган "эл-класико"лар ни ёдга оламиз. Мадридликлар финал босқичида "Барса"га 9 марта тўқнаш келган бўлса, шулардан 7 тасида ғалаба қозонишга муваффақ бўлди. Каталонияликлар фақатгина Хави ва Гвардиола қўл остидагина "қаймоқранглилар"ни таслим қила олди. 

Илк бор 1988 йилда Испания суперкубок финалида "Реал" ва "Барса" ўзаро ўйнаган ва икки учрашув натижасига кўра, "қироллик клуби" 3:2 ҳисобида ғалаба қозонган. Шундан кейин 1990, 1993 ва 1997 йилларда ҳам Мадрид жамоаси ушбу совринни "кўк-анорранглилар"ни енгган ҳолда қўлга киритган. Энг қизиқарли ва курашларга бой ўтган финал 2011 ва 2012 йилларда бўлиб ўтган "эл-класико"ларга тўғри келади.

2010/2011 йилги мавсумда Ла Лигада Хосеп Гвардиола шогирдлари ғолиб бўлади. "Реал" эса Испания кубогини қўлга киритади. Финалда эса "Барса"ни 103-дақиқада урилган Роналдунинг голи эвазига мағлуб қилади. Шу тариқа, бу икки клуб яна бир финалда тўқнаш келиши керак эди. Биринчи баҳс "Сантьяго Бернабеу"да ўтказиладиган бўлди. Жамоаларнинг таркиби эса қуйидагича эди: 

Дастлаб, 13-дақиқада Бенземанинг ўнг қанотда амалга оширган ажойиб ҳаракатлари ва Ўзилга берган пасидан кейин туркиялик футболчи ҳисобни очишга муваффақ бўлди. 35-дақиқада Месси майдон марказидан туриб қанотдаги Виллага тўпни узатди ва испаниялик ҳужумчи жарима майдончасига кириб ўтирмасдан зарба йўллаб, ҳисобни тенглаштирди. Тайм сўнггида Лео ўзининг қанотидан рейд уюштиришга қарор қилди. Шу орада Пепени майдон майсаси билан юзлаштириб, ичкарига кириб боради ва дарвозага тўпни жойлаштириб қўяди. Иккинчи бўлим бошида мезбонлар бурчак зарбасига эга бўлди, ҳаводан узатилган пас комбинацияга айланиб кетди. Тўпни эса Пепе орқароқдаги шериги Алонсога узатди ва ярим ҳимоячи узоқ пастки бурчакни нишонга олди. Қолган вақтда бошқа гол урилмади. Барчаси жавоб баҳсида маълум бўлади. 

"Камп ноу"да бўлиб ўтган учрашув кўплаб воқеаларга, голларга ва тўқнашувларга сабаб бўлган. Гвардиола Пикени бошланғич таркибга қайтарди, Моуриньо эса биринчи ўйиндаги таркиб билан майдонга тушиб келди. 

15-дақиқада майдон марказидан тўпни қабул қилиб олган Месси дастлаб Карвальодан осонлик билан ўтиб кетди, олдидан чиққан Хедирани ҳам алдади ва тўрт футболчи орасидан Иньестга пас бериб, бирга-бир вазиятга чиқариб юборди. Ярим ҳимоячи эса вазиятдан фойдаланиб, ҳисобни очди. 20-дақиқада Ўзил бурчак зарбасини амалга оширди. Хави эса тўпни қайтараман деб, Бенземанинг оёқлари остига тўпни ташлаб берди ва Карим ичкарига ерлатиб зарба берди. Унинг режасига кўра тўп кимгадир тегиб, дарвозага кириб кетиши керак эди. Шундай бўлди ҳам, Роналду гол уриб, имконияларни тенглаштирди. Тайм сўнггига қадар жамоалар ҳимояни унутди, кетма-кет зарбалар, қарши ҳужумлар ва секин-секин кескин ҳаракатлар кўпайди. 45-дақиқада "Реал" ҳимоясида пала-партишлик содир бўлди. Пикенинг кутилмаган узатмасидан кейин Месси ичкарида пайдо бўлди ва дарвозани ишғол қилиб, жамоасини олдинга олиб чиқди. 

Ўйин шиддати янада ошди. Майдонда ҳакам сарик карточкаларини аямаётган, футболчилар эса бир-бирларини аямаётган саҳналар ҳалигача видеоларни безаги бўлиб келади. 82-дақиқага келиб Бензема ҳисобни тенглаштирган бўлса, 88-дақиқада Лео қанотдан узатилган тўпни тўхтатиб ўтирмасдан зарба йўллаб, учрашувга нуқтани қўйди. Баҳс сўнгги эса жанжал билан тугаб, "Барселона" ўнинчи марта кубокни қўлга киритди. 

Икки тўқнашув натижасига кўра, футболчиларга умумий 13 та сарик, 3 та қизил карточка кўрсатилди. Жавоб ўйинидан кейин эса Моуриньо "Ball boy"лар тўпни вақтида майдонга қайтармаганини таъкидлади. Мутахассис нафақат ташқарида, балки майдон ичида ҳам вазиятларга аралашиб турди. Унинг Месси ва Фабрегасга нисбатан номақбул ишоралари кенг муҳокама қилинганди.