Shomurodovning o‘yini qanday baholandi?
“Roma” Konferentsiyalar ligasi guruh bosqichining to‘rtinchi turida o‘z muxlislari guvohligida “Budyo-Glimt” jamoasi bilan 2:2 hisobida durang o‘ynadi. Ushbu bahsda Eldor Shomurodov 66-daqiqada Nikolo Dzanolo o‘rniga maydonga tushdi.
Italiya futbolini yoritishga ixtisoslashgan www.calciomercato.com sayti “Roma” futbolchilarining o‘yinini baholab chiqdi.
Ruy Patrisiu, 5.5 ball
Norvegiyalik futbolchilar portugaliyalik darvozabon uchun dahshatga aylanib qoldi. Katta kamchiliklari ko‘zga tashlanmasada, Ruy Patrisiu ikkita o‘yinda “Budyo-Glimt” o‘yinchilaridan sakkizta to‘p o‘tkazib yubordi.
Rik Karsdorp, 5 ball
Niderlandiyalik himoyachi joy tanlashda ko‘p adashmoqda. Ayrim vaziyatlarda qaror qabul qilishni cho‘zib yubormyapti. Bu ko‘pinchi “Roma”ning tezkor qarshi hujum qilishiga to‘sqinlik qilmoqda.
Janluka Manchini, 5.5 ball
“Roma” himoyachilar orasida eng tezkori. Ikkinchi gol o‘tkazib yuborilganidan keyin vaziyatni o‘nglashga harakat qildi.
Brayan Kristante, 5.5 ball
Avvallari hujumkor futbolchi vazifasini bajargan Kristante himoyaga moslashishga qiynalmoqda. Dastlabki daqiqalarda ikki marta xavfli vaziyat yuzaga kelishiga sababchi bo‘ldi. Bu uchrashuvda himoyadan hujumga o‘tishini tashkil qilishda Kristante mas’ul edi. U buni uddalay olmadi. Biroq, Brayan aniq to‘p uzatishlari bilan ham e’tiborni tortdi.
Rojer Ibanes, 6 ball
Raqib futbolchisi Solbakkenga qarshilik qilish uchun tezkor himoyachi kerak ekan. Rojerga ochiqchasiga tezlik etishmadi. Uning xatolarini o‘yin oxirida gol urib, hisobni tenglashtirgani va “Roma”ni yana bir sharmandali mag‘lubiyatdan qutqarib qolgani yuvib ketdi.
Ebrima Darboe, 4 ball
Bu o‘yinchi avvalgi mag‘lubiyatdan xulosa chiqarmagan ko‘rinadi. Norvegiyalik futbolchilarning aksariyati Darboening borligi sezgani yo‘q. Jamoadoshlarini ogohlantirish kerak bo‘lgan pallada ham yarim himoyachi jim yuraverdi. Juda ko‘p xato qildi.
Gonsalo Vilyar, 5.5 ball
Darboe o‘rniga maydonga tushgan ispan yarim himoyachisi kurashga chanqoq ekanini ko‘rsatdi. Bir necha marta raqibdan to‘pni olib qshydi. Biroq Vilyar ham “Budyo-Glimt” etakchisi Botxeymga etarlicha qarshilik qila olmadi.
Nikolo Dzanolo, 4.5 ball
Nikolo raqib darvozasiga xavf solib turdi, lekin harakatlarining aksariyati besamar ketdi. Iste’dodli futbolchi ayrim vaziyatlarda hujumchilarga to‘p etakazib berishda kechikdi. Uning to‘p yo‘qotishidan keyin norvegiyaliklar ikkinchi bor hisobda oldinga chiqib oldi.
Eldor Shomurodov, 5.5 ball
O‘zbek hujumchisi Nikolo Dzanolo o‘rniga maydonga tushdi. Ancha faol o‘ynadi. Shomurodov o‘ziga berilgan vaqt davomida gol urish uchun bir juft imkoniyatga ega bo‘ldi. Biroq, gol urishni unutib qo‘ygan hujumchi bundan foydalana olmadi.
Genrix Mxitaryan, 4 ball
Avvallari ko‘p gol urishga qodir bo‘lgan futbolchi hozir maydonda o‘ziga pozitsiya qidirish bilan ovora. Shijoat etishmayotgani ko‘rinib qoldi. Uning o‘rniga maydonga tushgan Karles Peres ishonchliroq o‘ynadi va ispaniyalik futbolchining harakatlari 5.5 ballga loyiq ko‘rildi.
Stefan El-Shaaravi, 6.5 ball
Stefan irodasi bukilmas va tezkor futbolchi ekan. U ikki marta himoyani yorib o‘tolmaganiga qaramay, maqsad sari intilishdan to‘xtamadi. Natijada El-Shaaravi jamoasining birinchi golini kiritib, hisobni tenglashtirdi.
Temmi Abraxam, 5 ball
Abraxam yana o‘zini ko‘rsata olmadi. Go‘yo jamoadoshlari bilan mustahkam aloqa o‘rnata olmayotgandek ko‘rinmoqda. Uning o‘rniga maydonga tushgan Borxa Mayoral bir necha daqiqa ichida ikkita xavfli pas oshirdi. Hisobni tenglashtirgan gol aynan ispan hujumchisining pasidan so‘ng kiritildi. Shunga yarasha Borxa 6.5 ball bilan baholandi.
Joze Mourino, 4.5 ball
Mourinoga norvegiyaliklar yana bir bor dars berib qo‘ydi. Mourino shogirdlari maydonning har bir qismida ko‘p marta xatoga yo‘l qo‘ydi. Portugaliyalik mutaxassisni tarkib tanlashdagi kamchiliklari ham etarli. U asosan bir xil tarkibni o‘yinga qo‘ymoqda. Ikkinchi bo‘limda maydonga tushirilgan futbolchilar haqiqatan o‘yinni kuchaytirdi. Balki keyingi gal aynan zaxiradagi ijrochilardan foydalangan ma’quldir?
Fikrlar