"Qo‘qon-1912" murabbiyi "Paxtakor" ustidan qozonilgan g‘alaba suv va havodek zarurligini ta’kidladi

O‘zbekiston Liga kubogi guruh bosqichi 1-tur doirasidagi “Paxtakor” – “Qo‘qon-1912” uchrashuvidan keyin mehmonlar jamoasi bosh murabbiyi vazifasini bajaruvchi Aziz To‘xtaboev o‘yin haqidagi fikrlarni bildirib o‘tdi. Bu haqda klub matbuot xizmati xabar berdi.

- Avvalo, barchani kirib kelayotgan Ramazon Hayiti bayrami bilan tabriklayman. O‘yindan oldin muxlislarni xursand qilish va faqat raqibdan ustun kelish haqida o‘ylagan edik. Bugungi g‘alabani muxlislarimizga bag‘ishlaymiz. Ushbu g‘alaba bizga suv va havodek kerak edi. Superligada oxirgi o‘rinda borayotganimiz va g‘alaba qozona olmayotganimiz futbolchilarimizning ruhiyatiga salbiy ta’sir o‘tkazayotgandi. Bugungi muvaffaqiyatdan keyin futbolchilarning o‘zlariga bo‘lgan ishonch ortdi.

Bugun barcha futbolchilar maydonda bir oila sifatida hamjihat bo‘lib harakat qilishdi. Bugungi muvaffaqiyatimiz asosiy omili deb shuni aytgan bo‘lardim. Keyingi bahslarda ham faqat g‘alaba uchun maydonga tushamiz, - dedi murabbiy.