No‘’mon Hasanovga murabbiylar shtabida kimlar yordam berishi ma’lum

“Navbahor” jamoasi rasmiy ravishda No‘’mon Hasanovni bosh murabbiy lavozimida faoliyatini davom ettirishini ma’lum qildi. Bu haqida klub matbuot xizmati xabar tarqatdi.

Shuningdek, Hasanovning murabbiylar shtabi ham tasdiqlandi. Unga ko‘ra, serbiyalik Drajen Dukich No‘’mon Nurmatovichga yaqindan yordam beradi. Yurtimizning taniqli mutaxassislaridan biri Viktor Jalilov maslahatchi murabbiy etib tayinlandi.

Shuni aytish joizki, Dukich ilgari ham No‘’mon Hasanov bilan birga ishlagandi. Masalan, ushbu juftlik oxirgi marta “Qo‘qon-1912”da faoliyat olib borishgandi. Undan avval esa “Paxtakor”da ishlashgan.

Bundan tashqari, “Navbahor”ning murabbiylar shtabidan Sherzod Jo‘raev, Denis Toymentsov hamda darvozabonlar murabbiyi Pavel Sinelnikov ham joy egalladilar.