"Lokomotiv" bosh murabbiyi: "VAR yo‘qligi chatoq"

Pro liganing 9-turida "Lokomotiv" klubi "Olimpik Mobiuz" maydonida o‘tgan bellashuvda oxirgi daqiqadagi gol evaziga 1:2 hisobida juda muhim g‘alabani qo‘lga kiritdilar. Bellashuvdan so‘ng "Lokomotiv" bosh murabbiyi Grigoriy Kolosovskiy matbuot anjumanida fikrlari bilan o‘rtoqlashdi.

- Qiziqarli o‘yinning guvohiga aylandik. Harakatlar, hissiyotlar ko‘p bo‘ldi. Birinchi bo‘limning o‘zida o‘zimizga qulay hisob bilan oldinda borib, o‘yinni tugatib qo‘yishimiz kerak edi. Birinchi bo‘limda 3 ta yaqqol vaziyatga ega bo‘ldik, lekin ulardan foydalana olmadik. Shulardan gol urib, barchasini tugatib qo‘yishimiz kerak edi. Ikkinchi bo‘limda biroz ortda o‘ynadik va raqibga imkoniyat berdik. Raqib golida ular fol ishlatishgandi, biroq hakam hushtak chalmadi. Yigitlar esa to‘xtab qolishdi va oxirigacha o‘ynashmadi. Shu orqali hisob tenglashdi. Keyin yigitlarim harakat qilishdi, vaziyatlar yaratishdi va g‘alabaga intilishdi. Chunki biz duranglar chuqurligiga tushib qolgandik, nihoyat g‘alaba golini urdik. G‘alabaga harakat qildik va bunga erishdik.

- Bugungi o‘yin qanchalik qiyin o‘tdi?

- Raqib futbolchilari yosh, ular ko‘p yugurishadi, 90 daqiqa harakatlana olishadi. Bizda esa bir qancha futbolchilarimiz jarohatlangani bois muammolarga uchragandik. Ayrim futbolchilar o‘tgan o‘yinda ham ishtirok etishgandi. O‘tgan haftadagi mashg‘ulotlar jarayonida Ibrohim Yo‘ldoshev, Akaki Shulaya, Levan Arveladze ishtirok etishmayotgandi. Ikkinchi bo‘limda o‘yinni o‘zgartirish uchun harakat qildik. Raqib to‘p bilan bo‘lgan bo‘lsa-da, biz g‘alaba uchun harakat qildik. Biz to‘p uchun juda tartibli o‘ynadik. G‘alabaga erishdik, biroq barchasini birinchi bo‘limning o‘zida hal qilishni istagan bo‘lardim.

- O‘tgan turda siz sariq kartochka olgandingiz, bugun darvozabonlar murabbiyi Pavel Sinelnikov ogohlantirildi.

- Bularning barchasi hissiyotlarga bog‘liq. Hakamlarning qarorlari barcha uchun bir xil bo‘lishi kerak. Raqib futbolchisi bizning futbolchining libosidan tortib qolsa, hakam o‘ynashga qo‘yib beryapti. Gol o‘tkazib yuborgan vaqtimizda raqiblar bizning futbolchi oyog‘iga tepyapti, lekin yana hakam o‘yinga qo‘yib berdi. Raqib tomonga kichik kontakt bo‘lsa, hushtakni chalyapti. Jasur Hakimov sariq olgan vaziyatda u raqib darvozaboni yaqiniga ham bormadi, ha u hushtakdan keyin to‘pni tepgandir. Lekin u erda nega hushtak chalindi? Darvozabonga hujum ham bo‘lmagandi. U vaziyatni diqqatlik bilan ko‘rsin. Ha, VAR yo‘qligi chatoq. Lekin o‘yin juda qiziq o‘tdi. Raqib ham g‘alaba uchun o‘ynadi. Biz esa g‘alabani istadik. 

- "Lokomotiv"ni oldinda Qoraqalpog‘istonda "Aral"ga qarshi o‘yin kutmoqda. O‘yin yana o‘sha "Jayxun"ga qarshi o‘yin o‘tgan stadionda bo‘ladi.

- Oldinda bizni oddiy bo‘lmagan safar o‘yini kutmoqda. U maydonda to‘pning sakrashi ham, yurishi ham boshqacha. Shu sababli u maydonda barchaga qiyin. O‘shanda "Jayxun"ga qarshi juda yomon o‘yin ko‘rsatdik. Bu o‘yindan hulosa olgan holda biz kerakli tuzatishlarni olib boramiz va "Aral"ga ham, maydonga ham, jazirama issiqqa ham tayyor bo‘lamiz. U erga 3 ochko uchun boramiz va kurashishga tayyor bo‘lamiz.