"Спорт Экспресс" мухбири: "Ўзбекистон термасини плей-оффга чиқишини кутяпман"

Миллий терма жамоамиз илк бор жаҳон чемпионатида иштирок этади ва бу тарихий воқеани кўпчилик катта қизиқиш билан кузатиши табиий.

Масалан, қўшни ва бизга яқин бўлган мамлакатлар ҳам мундиалда терма жамоамизни қўллаб-қувватлашларини эшитяпмиз.

Яқинда бўлиб ўтган қуръа жараёнидан кейин вакилларимизнинг гуруҳи деярли аниқ бўлди. Нафақат ўзимизда, балки ташқарида ҳам мутахассислар, ОАВ вакиллари терма жамоамизинг гуруҳи, ундаги рақиблар борасида фикр-мулоҳазаларни билдирмоқдалар.

Россиянинг нуфузли “Спорт Экспресс” нашри журналисти Константин Белов мундиал масаласида Sports.uzдаги ҳамкасбининг айрим саволларига жавоб берди.

- Жаҳон чемпионатига қуръа ташлаш маросимини томоша қилдингизми? 

- Афсуски, мен жаҳон чемпионати қуръасини жонли эфирда томоша қилмадим. Россияда турнир катта қизиқиш уйғотмаяпти. Чунки миллий терма жамоамиз унда қатнашмаяпти.

- Терма жамоамиз жой олган гуруҳ борасида фикрингиз қандай?

- Менимча, Ўзбекистон плей-офф босқичига чиқиш учун кураша олади. Бундан ташқари, учинчи ўрин ҳам плей-оффга чиқишни кафолатлаши мумкинлигини унутмаслик керак. Бунинг учун камида битта ғалаба қозониш зарур.

- Гуруҳимизда Португалия билан Колумбия фаворитлар қаторида. Терма жамоамизнинг бўлажак иштироки хусусида нима дея оласиз?

- Ўзбекистоннинг плей-оффга чиқиш имконияти 40 фоизга баҳоланмоқда. Жамоанинг таркиби кучли, мамлакат учун илк жаҳон чемпионати. Бу эса ўзини кўрсатиш учун қўшимча мотивация бўлади.

- Сиз учун “ўлим гуруҳи” қайси?

- Янги форматни ҳисобга олган ҳолда мен аниқ “ўлим гуруҳи”ни кўрмаяпман. Балки Франция, Норвегия ва Сенегал иштирок этаётган “I” гуруҳини шундай деб ҳисоблаш мумкин.

- Умуман, Каннаваро бошчилигидаги терма жамоамиздан нима кутяпсиз?

- Мен Ўзбекистон терма жамоасини иккинчи ёки учинчи ўрин билан плей-офф босқичига чиқишини кутяпман. Жамоа жуда яхши таркибга эга, айрим футболчилар Европада ўйнашмоқда. Россиялик мухлислар албатта Ўзбекистон терма жамоасига ишқибозлик қилишади ва қўллаб-қувватлайдилар.