APL. MYu - "Arsenal": Turning markaziy bahsi oldidan prevyu

Bugun Angliya premer-ligasining birinchi turidagi eng qiziqarli o‘yin bo‘lib o‘tadi. Yangi mavsum oldidan sezilarli darajada o‘zgargan "Manchester Yunayted" va "Arsenal" jamoalari to‘qnash keladi. Ruben Amorim jamoa bilan to‘liq mavsumoldi tayyorgarlikni o‘tkazdi va endi unga bo‘lgan talablar boshqacha bo‘ladi.

O‘tgan mavsumda u o‘yinlar davomida strategiya va taktika haqida o‘ylashning qiyinligini ta’kidlagandi. Shunga qaramay, sovrin qo‘lga kiritish imkoniyati mavjud edi, biroq Evropa Ligasi finalida omad kulib boqmadi.

Mikel Arteta tanaffusda jamoani qayta shakllantirdi. "Arsenal"ning o‘yinidan istagancha zavqlanish mumkin, biroq sovrinlar yutish borasida "to‘pchilar" bugungi raqibdan farq qilmaydi. Uzoq muddatdan beri sovrinlar yo‘q va bu hol asosli tanqidlarga sabab bo‘lmoqda.

Jamoalar o‘zaro 246 marta to‘qnash kelgan. MYu 100 marotaba, "Arsenal" esa 91 ta g‘alabani qo‘lga kiritgan, 55 ta o‘yin durang bilan yakunlangan. O‘tgan mavsumda "Old Trafford"dagi uchrashuvda ham g‘olib aniqlanmagan edi.

Jamoalarning g‘alaba qozonish imkoniyatlari

"Manchester Yunayted" muxlislari uzluksiz muvaffaqiyatsizliklardan g‘azabda. O‘tgan mavsum Premer-liga tarixidagi eng muvaffaqiyatsiz mavsum bo‘ldi. Jamoa 15-o‘rinni egalladi va 2014-2015 yilgi mavsumdan buyon ilk bor evrokuboklar ishtirokidan mahrum bo‘ldi. Endi murabbiylar jamoasi oldida u erga qaytish vazifasi turibdi.

Mavsumlararo davrda jamoaning hujum chizig‘i kuchaytirildi. "RB Leyptsig"dan 22 yoshli chexiyalik hujumchi Benyamin Sheshko, "Brentford"dan o‘ng qanot hujumkor yarim himoyachisi Brayan Mbemo, "Vulverxempton"dan hujumchi Mateus Kunya keldi. Ularning barchasi uchun 220 million evrodan ortiq mablag‘ sarflandi.

"Manchester Yunayted" ishtirokidagi so‘nggi beshta o‘yin natijalari:

"Manchester Yunayted" - "Fiorentina" - 1:1 (penaltilar seriyasi 5:4)

"Manchester Yunayted" - "Everton" - 2:2

"Manchester Yunayted" - "Bornmut" - 4:1

"Manchester Yunayted" - "Vest Xem" - 2:1

"Manchester Yunayted" - "Lids" - 0:0

"Arsenal" mavsumlar oralig‘ida faol ravishda yangi futbolchilarni izladi va ularni mankunianliklar bilan deyarli bir xil summaga sotib oldi. "Arsenal"da yarim jamoa yangilandi. Mikel Arteta tarkibni shakllantirishda ustozi Xosep Gvardiolaning tamoyillaridan chekinmoqda. Avvalgi kontseptsiyaga ko‘ra, asosiy tarkib futbolchilari universal bo‘lishi va zarur hollarda bir nechta pozitsiyalarni egallashi kerak edi.

Endi murabbiylar shtabi har bir pozitsiya uchun teng kuchga ega bo‘lgan ikkita futbolchiga ega bo‘lishni istayapti. Transferlar orasida eng muhimi - "Sporting"dan hujumchi Viktor Dyokereshning kelishi bo‘ldi. U hujum paytida ajoyib tarzda ochilishni biladi va Artetaga etishmagan hujumdagi xilma-xillikni yaratadi. Agar samaradorlik ham shu darajada bo‘lsa, sarflangan 65,8 million evro o‘zini to‘liq oqlaydi.

Biroq, shved pasportiga ega bo‘lgan vengriyalik futbolchi jamoaning eng qimmat xaridi bo‘lmadi. Ispaniya terma jamoasining tayanch yarim himoyachisi Martin Subimendi uchun "Real Sosedad"ga 70 million evro to‘landi. Ikkala futbolchi ham asosiy tarkibda o‘ynaydi, shu bilan birga, zaxira uchun boshqa qimmatbaho xaridlar ham mavjud. Yangi o‘yinchilar orasida yarim himoyachilar Noni Madueke va Kristian Nergor, himoyachi Kristian Moskera va darvozabon Kepa Arissabalaga bor.

Esda tutish kerakki, "Arsenal" tarkibida o‘tgan mavsumda ko‘plab jarohatlangan o‘yinchilar bo‘lgan va ular asta-sekin safga qaytmoqda. Hozirda murabbiylar shtabida tanlash imkoniyati keng. Futbolchilar o‘rtoqlik o‘yinlarida sinovdan o‘tishdi, bunda "to‘pchilar" turli natijalar ko‘rsatishdi. Amirliklar kubogi uchun o‘tkazilgan asosiy tayyorgarlik o‘yini "Atletik Bilbao" ustidan qozonilgan yirik g‘alaba bilan yakunlandi.

"Arsenal" ishtirokidagi so‘nggi beshta o‘yin natijalari:

"Arsenal" - "Atletik Bilbao" - 3:0

"Arsenal" - "Vilyarreal" - 2:3

"Arsenal" - "Tottenxem" - 0:1

"Arsenal" - "Nyukasl" - 3:2

"Arsenal" - "Milan" - 1:0

Jarohatlangan o‘yinchilar

"Manchester Yunayted" mavsumni asosiy himoyachisi Lisandro Martinessiz boshlaydi, u xochsimon paylarining uzilishidan so‘ng tiklanish davrini o‘tkazmoqda. Iyul oyida yana bir himoyachi Nussair Mazraui ham jarohat oldi va o‘rtoqlik o‘yinlarida ishtirok etmadi. Biroq, Andre Onana va Joshua Zirkzee mashg‘ulotlarga qaytishdi, ammo bugun ularni asosiy tarkibda ko‘rmaymiz.

"Arsenal" tarkibida ham yo‘qotishlar mavjud. Himoyachi Gabriel Jezus yanvar oyida tizza boylami uzilishi bilan jarohat oldi va kuzda jamoaga qaytishi mumkin. Qolgan barcha futbolchilar yangi mavsumga tayyor holatda.

Xullas bugungi bahs ikki jamoa uchun ham muhim hisoblanadi. Mavsum boshidagi ajoyib start turnir davomidagi g‘alabalar uchun poydevor bo‘lishi mumkin!