Ямал “Барса”да ишкал чиқарди. У бир юлдуз кетишини талаб қиляпти

“Барселона” билан узоқ муддатли шартнома имзолаш арафасида турган Ламин Ямал клуб раҳбариятига кучли таъсир ўтказа бошлади.

Испан матбуотининг ёзишича, 17 ёшли футболчининг жамоа етакчиларидан ҳисобланган Гави билан муносабати бузилган ва ўртадаги зиддият кучайиб бормоқда. Манбага кўра, Ламин Ямал Гави бош мураббий Ханс-Дитер Фликнинг севимли ўйинчиларидан бири эканини ҳазм қила олмаяпти.

Бундан ташқари, 20 ёшли Гави ҳали анча навқирон бўлса-да, жамоада жуда катта таъсир кучига эга ва жамоадошлари унинг характерини қадрлаб келади.

Агар клуб раҳбарияти жамоада қайси ўйинчини олиб қолиш бўйича бир қарорга келиш керак бўлса, мутасаддилар Каталонияда Ламин Ямал қолишини маъқул кўриши айтилмоқда. Клуб Гавини сотиб юборишга тайёр.

Бу ўйинчига ҳозирнинг ўзида “Пари Сен-Жермен” жиддий қизиқиш билдирмоқда ва трансфер учун катта сумма йўналтиришга тайёр.