Роналду: Месси билан таққослаганда камтарлик қилмайман

“Ан-Наср” ва Португалия терма жамоаси ҳужумчиси Криштиану Роналду таниқли журналист Пирс Морганга берган интервьюсида ўзини “Интер Майами” футболчиси билан таққослаш ҳақидаги саволга жавоб берди.

Пирс Морган 40 ёшли ҳужумчидан “Месси сендан зўр, деган фикрлар бор, бунга қандай қарайсан?”, деб сўради.

- Бунақа фикрларга ва Месси мендан яхшироқ эканинига қўшилмайман. Бу борада камтарлик қилмайман, - деб жавоб берди Криштиану Роналду.

Лионель Месси ва Криштиану Роналду ўртасидаги рақобатнинг энг ёрқин даври ҳар икки футболчи Испания чемпионатида тўп тепган йилларга тўғри келади. Аргентиналик юлдуз “Барселона” сафида ўйнаган, саккиз бор “олтин тўп”ни қўлга киритган, Испания, Европа Чемпионлар лигаси,жаҳон ва Америка чемпиони бўлган.

Роналду эса, маҳоратини “Реал”да кўрсатган. Португалиялик юлдуз беш бор “Олтин тўп”га сазовор бўлган. Португалия терма жамоаси билан Европа чемпиони, Миллатлар лигаси ғолиби, Испания чемпионати ва Европа Чемпионлар лигасида зафар қучган.

Бундан ташқари, ҳар икки юлдуз фаолияти давомида кўплаб бошқа совринларга эга чиққан ва бир неча такрорланмас рекордларни ўрнатгани билан ҳам ном қозонган.