Холанд: Мбаппе борлигини унутманг!

“Манчестер Сити” ҳужумчиси Эрлинг Холанд голлар сериясини давом эттириб, Англия Премьер-лигасининг еттинчи турида “Брентфорд” дарвозасини ҳам ишғол қилди.

“Шаҳарликлар”га ғалаба келтирган ушбу гол 25 ёшли форвард учун янги чемпионатдаги 9-гол бўлди.

Ўйиндан кейин журналистлар Эрлингдан Европа лигаларининг энг зўр тўпурарига бериладиган “Олтин бутса” учун курашда “Бавария” ҳужумчиси Ҳарри Кейн билан ўзаро рақобат ҳақида сўрашди.

- Сиз Ҳарри Кейн билан рақобат ҳақида сўраяпсиз. Лекин Килиан Мбаппе борлигини ҳам унутманглар, - деди Эрлинг Холанд.

Айни пайтда “Олтин бутса” рейтингида Бундеслигада рақиблар дарвозасини 11 бор ишғол қилган Ҳарри Кейн пешқадамлик қилмоқда. Эрлинг Холанд ва Килиан Мбаппе ҳисобида тўққизтадан гол бор.