Vitaliy Levchenko: "Ishonamanki, yigitlar bizning niyatimizni amalda ro‘yobga chiqaradilar"

1 mart sanasidan Superligada O‘zbekiston chempionati boshlanadi. "Neftchi" yangi mavsumga Turkiyaning Antaliya shahrida qariyb ikki oy tayyorgarlik ko‘rib qaytdi.

2 mart kuni jamoa a’zolari Jizzax shahrida "So‘g‘diyona" bilan birinchi bahsga kirishadi. Chempionat oldidan "Neftchi" bosh murabbiyi Vitaliy Levchenkoga qator savollar bilan murojaat qildik.

— Turkiyadagi yig‘inlar ko‘ngildagidek o‘tdimi?

— Antaliyadagi tayyorgarliklar jamoaning murabbiylar shtabi tomonidan ishlab chiqilgan rejalar asosida ko‘ngildagidek o‘tdi.

— Jamoa tarkibini yangi  mavsumga shakllantirish ishlari siz o‘ylagandek amalga oshdimi?

— Safimizga qo‘shilgan barcha yigitlar malakali futbolchilardir. Mavsumga tayyorgarlik mobaynida biz ularga jamoamizning rejalari va o‘yin strategiyasini to‘la singdirishga harakat qildik. Ishonamanki, yigitlar bizning niyatimizni amalda ro‘yobga chiqaradilar.

— Yangi mavsumda jamoa oldida qanday reja va vazifalar turibdi?

— Maqsad va niyatlarimiz har doimgidek yuksak va olijanob. Chunki, "Neftchi" azal-azaldan muxlislarni g‘olibona yurishlari va mahoratli harakatlari bilan mamnun etib kelgan. Bu mavsumda ham ana shu olijanob an’analar davom ettiriladi.

— Mavsum oldidan muxlislarga qanday tilaklaringiz bor.

— Tilagim shuki, jamoamizning o‘yinlari muxlislarimiz va ashaddiy jonkuyarlari orzu niyatlarini qondirishga munosib bo‘ladi. Ular hamisha o‘yingohdan xursandchilik va olqishlar bilan chiqishadi.

"Neftchi" PFK matbuot xizmati.