Винисиус: Ямал қанисан, қани энди гапир!

Испания чемпионатининг ўнинчи турида “Реал” ўз мухлислари кўз ўнгида амалдаги чемпион “Барселона”ни қабул қилиб, қийин ўтган учрашувда 2:1 ҳисобида зафар қучди.

Мадридликларнинг голларига Килиан Мбаппе ва Жуд Беллингем муаллифлик қилган бўлса, каталонияликларнинг ягона жавоб тўпини Фермин Лопес киритди.

Учрашувдан кейин “Реал” футболчиларидан Дани Карвахаль ва Винисиус Жуниор рақиб футболчиси Ламин Ямал билан орани очиқ қилишга уринди. Гап шундаки, “Барселона”нинг 18 ёшли футболчисининг “Реал” ҳақидаги гаплари орага совуқчилик туширган эди.

- Ямал сен кўп гапираётган эдинг, қани энди нима дейсан?, - деди Винисиус Жуниор ўйиндан кейин каталонияликлар етакчисига.

Таъкидлаш жоизки, учрашувнинг охирида ҳар икки жамоа вакиллар  ўртасида жанжал ҳам бўлиб ўтди. Тўполонда ўзини кўрсатган “қаҳрамон”лардан бири Винисиус Жуниор бўлди. Бразилиялик юлдузни тинчлантириш учун бош мураббий Хаби Алонсо ҳам аралашишига тўғри келди.

“Эл-класико”даги муҳим ғалабадан кейин мадридликлар жамғарган очколари сони  27 тага етказиб олди. “Барселона” энди рақибдан беш баллга ортда қолмоқда.