Винисиус 4 топ-клубдан таклиф олди. У кимнинг чорловини қабул қилади?

“Реал”нинг бразилиялик юлдузи Винисиус Жуниор ҳали клуб билан янги шартнома имзолагани йўқ. Бу 25 ёшли футболчини олишга уринаётган жамоаларда трансфер умидини уйғотмоқда.

Европадаги футбол манбаларининг ёзишича, агар Винисиус амалдаги келишувни узайтиришга кўнмаса, “Қироллик клуби” ёзда уни сотиб юборади.

TBR Football ва Transfer News Live каби нуфузли нашрлар ҳужумчига Англия Премьер-лигасининг топ-клубларидан чорлов бўлаётганини ёзди.

Унга кўра, Винисиус Жуниор атрофидаги вазиятни кузатиб бораётган “Арсенал”, “Челси”, “Ливерпуль” ва “Манчестер Сити” мутасаддилари футболчининг агентлари билан боғланиб, ҳамкорлик масаласини ўртага қўя бошлаган.

Винисиуснинг клуб билан шартномаси 2027 йилнинг ёзигача давом этади. Transfermarkt портали 170 миллион еврога баҳолаётган юлдузни Саудия Арабистони клублари ҳам катта маош эвазига олиб кетишга уринмоқда.