Вашингтон шаҳри мери 2025 йил 11 апрелни Александр Овечкин куни деб эълон қилган!

Вашингтон мери Мюриел Баузер 2025 йил 11 апрелни АҚШ пойтахтида россиялик хоккейчи Александр Овечкин куни деб эълон қилди. Аввалроқ "Вашингтон Кэпиталз" форварди фаолиятидаги 895-голини урди ва НҲЛ мунтазам чемпионатлари тарихидаги энг яхши тўпурарга айланганди.

"Мен, Вашингтон мери, шу билан 2025 йилнинг 11 апрелини "Алекс Овечкин куни" деб эълон қиламан.” Биз вашингтонликлар, хоккей мухлислари, "Буюк Саккизлик" мухлислари сифатида Овини ушбу ажойиб ютуғи билан табриклаш ва унга Вашингтонда ўйнагани учун миннатдорчилик билдириш учун бирлашамиз”, - дея жамоанинг Х ижтимоий тармоғидаги саҳифасида эълон қилинган.

11 апрел санаси танланди, чунки ўша куни россиялик форвард ва "Вашингтон Кэпиталз" сардори Александр Овечкин Миллий хоккей лигасининг мунтазам чемпионатларида гол уриш бўйича рекорд ўрнатганидан кейин шарафланган.

Эслатиб ўтамиз, Овечкин 6 апрел куни "Нью-Йорк Айленерс"га қарши ўйинда (1:4) ўзининг 895-голини уриб, НҲЛнинг оддий мавсумларида гол уриш бўйича рекорд ўрнатган эди. Бу билан у канадалик Уейн Гретскийнинг (894) 26 йил давомида эришган ютуғини ортда қолдирди. Янги рекорд ўрнатиш учун Овечкинга 1487 ўйин керак бўлди.