Vadim Abramov: Xo‘p, bu o‘yinda men taktik tomonlama yutqazdim. Futbolchilar bir bosh baland, murabbiy esa omadsiz

O‘zbekiston va Iroq terma jamoalari o‘rtasidagi o‘rtoqlik uchrashuvi yakunlandi. O‘yindan keyingi matbuot anjumanining ikkinchi qismida Vadim Abramov ishtirok etdi.

"Muxlislar oldida uzr so‘rashni xohlardim. Bugun ularni xursand qilishni istagan edik. O‘yin yaxshi bo‘ldi. Tayyorgarlik uchun Iroq yomon raqib emasdi. Bunday jamoalarga qarshi himoyada yaxshi harakat qilish lozim. G‘alaba qozonganingizda, bu muammolar ko‘rinmaydi. Menimcha, bizda yomon jamoa yig‘ilmagan. Mag‘lub bo‘lishimizga qaramay, oldinda turgan vazifani uddalashimizga ishonaman. Bu baxonadek ko‘rinishi mumkin, lekin Iroq O‘zbekistonga 22 mart kuni keldi, biz esa 26 kuni o‘yin o‘tkazdik. Bugungi o‘yinda o‘tgan safargi futbolchilarga dam berishimiz ham mumkin edi. Ammo muxlislar Shomurodov va boshqa legionerlarni ko‘rishni istashi aniq.

Himoyada yaxshi harakat qilmayapmizmi, demak, ko‘proq gol urishimiz kerak. Bu - futbol! Sen urmasang, senga urishadi. Iroqni Saudiya Arabistoni bilan solishtirmaslik lozim. Bu o‘yinda yutqazayotib hujumga o‘tdik, raqib faqat qarshi hujumda o‘ynadi. Balki yana gol o‘tkazib yuborishimiz mumkin edi. Xatolarimiz uchun jazolandik.

Sergeev jarohat olgandi. Shomurodov gol urishni xohladi. Shuning uchun uni o‘yinning oxirigacha maydonda qoldirdim. Gol urolmaganidan uning juda jaxli chiqdi. Biz hujum chizig‘i haqida o‘ylamayapmiz. U yuqori darajadagi futbolchi.

Xo‘p, bu o‘yinda men taktik tomonlama yutqazdim. Futbolchilar bir bosh baland, murabbiy esa omadsiz".