Улар ғалабага мухтож ёхуд Қўқонда эски рақиблар...

ФИФА кунлари якунлангач, яна миллий чемпионатимизда баҳслар бошланмоқда. 13 июнь санасидан Суперлигада 12-турга старт берилади. Ўтган йили про лигада қатнашиб, бу йил элитага йўл олган клублар - "Қўқон-1912" ва "Машъал" жамоалари Қўқонда ўзаро куч синашадилар.

Баҳром Ҳайдаров жамоаси кетма-кет мағлубиятлардан сўнг бу сафар ўз майдонида ушбу рақибини мағлуб этиш орқали мухлисларини хурсанд қилмоқчи. Иккала рақиб бир-бирини яхши билади. Албатта, "Машъал" ҳам анойилардан эмас. Турнир жадвалида иккала жамоа 12 очкодан 11 ва 12-ўринларни эгаллаб турибдилар. 

Бўлажак учрашув ҳар иккала жамоа учун муҳим ҳисобланади. Чунки қўқонликлардан ташқари "Машъал" ҳам ғалабага мухтож бўлиб турибди. Бу ўйин "Қўқон-1912" учун ҳам, "Машъал" учун ҳам уч очкони қўлга киритиш борасида яхши имконият.

Қўқонда бўлиб ўтадиган учрашувни наманганлик Ғайрат Жўраев бошқариб боради. Унга қанотларда Ислом Носиров ва Расул Фозиловлар ёрдам беришади. Заҳира ҳаками эса Исроил Имомназаров. Ҳакамлар ишини Жаҳонгир Саидов назорат қилади. Учрашув комиссари - Диёр Хотамқулов 

Жамоалар шу пайтга қадар чемпионат доирасида 22 марта тўқнаш келишган. Бу ўйинларда ғалабалар сони бўйича "Қўқон-1912" 9 та, "Машъал" эса 7 та ғалаба қозонган. 6 та учрашувда дуранг натижа қайд этилган. Тўплар нисбати "Машъал" фойдасига 28-26.

Ўзаро ўйинларда жамғарилган очколар бўйича "Қўқон-1912" 33, "Машъал" эса 27 очко тўплаган. "Машъал"нинг ўзаро ўйинларда қозонган энг йирик ғалабаси 4:2, "Қўқон-1912"нинг энг катта ғалабаси эса 3:1 ҳисобида якунланган.

Кўриб турганингиздек, ўзаро беллашувлар статистикасида бироз устунлик қўқонликлар тарафида бўлиб турибди. Бироқ рақамлар ҳар доим ўйин олдидан клубларга мутлақо аҳамият касб этмайди. Чунки бу статистик кўрсаткичлар ҳисобланади. 

13 июнь куни 20:00 да бошланадиган беллашувда мухлислар қизиқарли ўйин гувоҳига айланишлари катта эҳтимол.