Трой Дини: "Исак Ширер йўлини такрорлаши шарт эмас"

"Ньюкасл" ҳужумчиси Александер Исак "Ливерпуль" таклиф этган 110 миллион евро + бонусларга қарамай сотилмади. Швециялик форвард эса клуб билан келишилган ваъда бузилганини айтди, машғулотларда иштирок этмасдан, майдонга чиқишдан ҳам бош тортмоқда.

"Ушбу вазиятда Исак Златан Ибрагимовични ўйлайди. Швециянинг энг машҳур футболчиси турли мамлакатларда чемпион бўлган, катта трансферлар учун клублар билан тортишишдан ҳам қочмаган ва тарихда буюк футболчи сифатида қолган.

Исак ҳам: "Мен "Ньюкасл"да қаҳрамон бўлишим мумкин, аммо Златан даражасига чиқаманми? Йўқ. Буюклар қаторига кириш учун катта клубларда титуллар ютиш керак", – деб ўйлаши табиий.

"Ньюкасл"да у аллақачон тарих яратди – 70 йил ичида биринчи катта соврин бўлган Кубокни қўлга киритишда муҳим роль ўйнади. Алан Ширер ёки Питер Бирдсли каби афсоналар ҳам бунга эриша олмаган.

Исак қўлида Кубок билан тушган суратлар тарихда қолади. Фанатлар нафрати бунга таъсир қила олмайди. Ҳатто, у Ширернинг гол рекордларини янгилаган тақдирда ҳам бу "Ливерпуль" билан ютиш мумкин бўлган совринларга тенг келмайди.

Оқилона мухлислар эса охирида шундай дейишади: "Биз 90 миллион евро қайтариб олдик, у эса 23 гол урди, клубни Чемпионлар лигасига олиб чиқди ва Кубок совға қилди. Бу етарлича мустаҳкам мерос", – деди "Уотфорд"нинг собиқ ҳужумчиси Трой Дини.