Тўпурар ҳужумчи МЮга ўтишдан бош тортди

"Спортинг" ҳужумчиси Виктор Дьёкереш "Манчестер Юнайтед" клубининг трансфер таклифини рад этди. Бу ҳақда Record нашри хабар бермоқда.

Манбага кўра, 27 ёшли футболчининг агентлари аллақачон "қизил иблислар"ни уларнинг қарори ҳақида хабардор қилган.

Аввалроқ ОАВда "Манчестер Юнайтед" Дьёкерешни трансфер қилиш учун "Спортинг"га 71,4 миллион евро тўлашга тайёр экани ҳақида хабарлар тарқалган эди. Шунингдек, швед ҳужумчисига "Арсенал" ва "Ювентус" клублари ҳам қизиқиш билдираётгани таъкидланган.

Ўтган мавсумда Дьёкереш барча мусобақаларда 52 ўйинда майдонга тушиб, 54 та гол ва 13 та голли узатма билан ажралиб турган.

Футболчининг амалдаги шартномаси 2028 йилнинг ёзигача мўлжалланган. Transfermarkt порталидаги маълумотларга кўра, унинг бозор баҳоси 75 миллион еврони ташкил этади.