"Tokio-2020": MDHda ikkinchi, Markaziy Osiyoda birinchi bo‘ldik!

Bundan biroz avval, "Tokio-2020" yozgi Olimpiya o‘yinlaridagi o‘zbekistonlik so‘nggi sportchi – Bahodir Jalolov finalda amerikalik bokschini taslim qilgan holda terma jamoamiz hisobiga 3-oltin medalni yozdirib qo‘ydi.

Shu tariqa, O‘zbekiston delegatsiyasi 3 ta oltin va 2 ta bronza medallari bilan Olimpiadani yakunladi."

"Tokio-2020" yozgi Olimpiya o‘yinlarining yakunlanishiga ham sanoqli soatlar qolmoqda. O‘zbekiston delegatsiyasi hozirda umumjamoa hisobida 31-o‘rinni egallab turibdi.

Ushbu natijani MDH mamlakatlari orasida oladigan bo‘lsak, O‘zbekiston Rossiya Olimpiya qo‘mitasi delegatsiyasidan so‘ng 2-o‘rinni egalladi.

Markaziy Osiyo davlatlari orasida esa hamyurtlarimiz umumjamoa hisobida 1-o‘rinni qo‘lga kiritishdi. O‘zbekistondan so‘ng 2-o‘rin qo‘shni Qirg‘iziston delegatsiyasiga nasib etdi. 16 nafar sportchi bilan Olimpiadaga borgan Qirg‘iziston yakunda 2 ta kumush va bitta bronza medaliga sazovor bo‘ldi. Keyingi o‘rinlarni Turkmaniston (batta kumush) va Qozog‘iston (8 ta bronza) egalladi. Tojikiston esa musobaqani medalsiz yakunladi.