Tojikiston terma jamoasi boshqa murabbiy qidiryaptimi?

So‘nggi kunlarda Tojikiston terma jamoasi bosh murabbiyi Petr Segrtning iste’fosi borasida mish-mishlar urchib ketdi. Shu masalaga oydinlik kiritish maqsadida kichik surushtiruvni amalga oshirdik.

Ma’lum bo‘lishicha, Tojikiston futbol federatsiyasi terma ustozini iste’foga chiqarmoqchi emas. Ayni damda, mamlakat futbol rahbarlari hech qanday boshqa murabbiy bilan muzokaralar ham olib bormayapti.

Eslatib o‘tamiz, bu mutaxassis qo‘l ostida Tojikiston Osiyo chempionatida ishtirok etish huquqini qo‘lga kiritgan edi. Qo‘shnilarimiz qit’a birinchiligida “A” guruhidan o‘rin egallagan bo‘lib, Qatar, Livan va Xitoyga qarshi kurash olib boradi.