Терма жамоада ўйнаган футболчи вафот этди

“Андерлехт” клуби ва Бельгия терма жамоасининг собиқ ҳимоячиси Глен Де Бук мияга қон қуйилиши оқибатида 54 ёшида оламдан ўтган.

RMC Sport хабар беришича, у Антверпен шаҳрида вафот этган.

Оила аъзоларининг сўзларига кўра, собиқ футболчи уйида бўлган пайтда миясига кучли қон қуйилган, шундан кейин у чуқур комага тушган ва ҳушига келмасидан жони узилган.  

Глен Де Бук ўз фаолиятида давомида Бельгия терма жамоаси сафида 36 та ўйинда майдонга тушган ва битта гол урган.

Ҳимоячи позициясида ўйнаган Глен ўз юртида “Мехелен” ва “Андерлехт” клублари шарафини ҳимоя қилган. “Андерлехт” таркибида уч карра мамлакат чемпиони ва икки марта Бельгия Суперкубоги соҳиби бўлган.

Профессионал футболчилик фаолиятини якунлаганидан кейин Глен де Бук мураббийликка киришган. Бу мутахассис Бельгия ва Нидерландияда саккизта жамоада мураббийлик қилган.