Superligada bahsli vaziyatlar ko‘payishiga faqat hakamlar aybdormi? VAR najotmi yoki...
Superliganing har turida hakamlarning qarorlari bilan bog‘liq bahsli vaziyatlar ko‘paymoqda. Qaysidir tomon norozi bo‘lmoqda. Aslini olganda bunday holat tabiiydek. Ammo bir lekini bor: bu vaziyatlar doimiy bo‘lsa chindan ham muammo bor.
“Paxtakor” ishtirokidagi o‘yinlarda Maksim Shatskix har uchrashuvdan so‘ng hakamlar haqida gapirishni yomon ko‘rsa-da, e’tirozlar bildirmoqda. Biroq “Paxtakor” ikkinchi o‘yinda ham “Olimpik”ni yuta olmaniga faqatgina hakamlar aybdor qilmasligi lozim. Mayli qandaydir qarorlar murabbiyning e’tiroziga sababdir. Lekin referilar 180 daqiqa “sherlar”ning o‘ynashiga to‘sqinlik qilmagandir. Shuning uchun Shatskix aybni o‘z jamoasidan qidirishi ham kerak.
To‘g‘ri, murabbiyning ayrim gaplarida jon bor. Masalan, hakamlar o‘yinlarni juda ko‘p to‘xtatishi. Bu chindan ham o‘yin tempini pasaytiradi. U Evropa futbolida katta tezlikni ko‘rib o‘rgangan. Bundan to‘xtalishlarni hazm qila olmasligi aniq.
Shatskixning 2 o‘yindayoq fikri o‘zgardi. Buni Superliga deydilar
Shuningdek, VARdagi referilar qaysi vaziyatlarda sariq kartochka berilishini yaxshiroq bilishi kerak. Bosh hakam VARda ko‘rgandan so‘ng qaysidir futbolchiga sariq kartochka ko‘rsatilishi faqat bizning futbolda uchrasa kerak.
Hakamlar VARga borganda vaziyatni ko‘rishga ancha vaqt sarflamoqda. Bosh hakam bu texnoligiyaga borib nimanidir yaqqol ko‘rmaydi. Chunki translyatsiya sifati juda pas. Bellashuvni boshqarayotgan inson qaror qabul qilishda ikkilanib, VARga umid bilan boradi. Ammo o‘zidagi mavjud fikr ham o‘zgarib ketishi shubhasiz.
Xorijda bu sistemadan umuman muammo yo‘q. VARda barchasi aniq ko‘rinadi. Chunki translyatsiyalarni amalga oshirayotganda telekompaniya yoki telekanal zamonaviy kameralardan foydalanadi. Hakam vaziyatlarni turli rakurslardan sifatli kadrlarda ko‘rib, baho beradi.
Yaqindagina SPORTS.uz saytida mehmon bo‘lgan Alisher Nikimbaev VAR borasida fikr bildirgandi. Unda mutaxassis chet elda hakamlar o‘yinlarga avvalgidek tayyorlanmay qo‘yganini, bunga sabab qilib VARni ko‘rsatgandi. Chunki referilar VARga oshinib qolayotgani, VAR orqali xatosini to‘g‘rilashi mumkin, degan fikr paydo bo‘lib qolganligini aytgandi. Bizdachi?
Shatskix “Paxtakor”ga noilojlikdan kelganmi? O‘zbek futbolidagi shubhali murabbiylar kimlar? - Alisher Nikimbaev
Bizda bu amaliyot teskarisi. VAR najotdan ko‘ra aksi. Qarshidagi “Nasaf” – AGMK bellashuvida bosh hakam Aziz Asimovga ancha qiyin bo‘ldi. Bosim yuqori edi. 84-daqiqada Anzur Ismoilovning qo‘liga to‘p tegdimi yoki yo‘q vaziyatga baho berish juda qiyin. Ayniqsa VARdagi lavhalardan.
Takroriy vaziyatni ko‘rmasdan oldin, penalti borga o‘xshadi. Keyin lavhalar fikrimni biroz o‘zgartirdi. Ko‘pchilikda shunday bo‘lsa ajab emas. Ha aytgancha, PFL rahbari Diyor Imomxo‘jaev telegramdagi sahifasida bu vaziyatga o‘z fikrlarini bildirdi.
- “Nasaf” — AGMK o‘yini bo‘yicha savollarimiz va e’tirozlarimiz bor. Hakamlar markaziga buni bildirdik va o‘yinni ekspertlar guruhi o‘rganib chiqishini so‘radik. Agar bosh hakam o‘ziga ishonmayotgan bo‘lsa va VAR unga kerakli kadrni topib bera olmagan bo‘lsa, hammasini aniq ko‘rganiga ishonayotgan qanot hakamining fikrini eshitishi kerak emasmidi, degan savolni o‘rtaga tashladik. Fikrimcha, ikki kulminatsion nuqtada Asimov AGMK manfaatidan kelib chiqib, qaror qabul qilgandek. Biroq mening fikrim ham sizniki kabi sub’ektiv. Ishonamanki, ob’ektiv bahoni markaz beradi, - dedi PFL rahbari.
Endi hakamlar markazining xulosasini kutamiz. Shunisi ayon bo‘lmoqdaki, hakamlar markaziy o‘yinlarni boshqarishda o‘zida kuchli xohish bo‘lmasligi mumkin. Bosim yuqori. Qandaydir noto‘g‘ri qaror ularga nisbatan salbiy fikr uyg‘otmoqda.
Bekzod ISAEV
Fikrlar