Слот Алекс Фергюсоннинг 2011 йилдаги натижасини такрорлади

"Ливерпуль" бош мураббийи Арне Слот "Манчестер Юнайтед"нинг собиқ устози Алекс Фергюсоннинг ютуғини такрорлади. Нидерландиялик мутахассис август ойида Англия Премьер-лигасининг энг яхши мураббийи деб топилди.

Х ижтимоий тармоғида Opta Sport порталининг хабар беришича, 2011 йилдан буён илк бор АПЛнинг амалдаги чемпиони бош мураббийи янги мавсумнинг биринчи ойининг энг яхши мураббийи совринини қўлга киритган. Қайд этилишича, сўнгги мартта бу натижага эришган мураббий айнан Алекс Фергюсон бўлган.

"Ливерпуль" АПЛ-2024/2025 мавсумида 38 турда 84 очко жамғариб, 1-ўринни эгаллади. Иккинчи ўриндаги "Арсенал" билан орадаги фарқ 10 очкони ташкил этган эди. Янги мавсумнинг дастлабки уч турида "мерсисайдликлар" "Борнмут" (4:2), "Ньюкасл" (3:2) ва "Арсенал" (1:0) устидан ғалабага эришди.