“Сити”нинг шу иккинчи ўйинчисидан ҳайратдаман!

“Манчестер Сити” яқинда бразилиялик легионери Савио билан амалдаги шартномани 2031 йилнинг ярмигача узайтирганини расман эълон қилганди.

21 ёшли ҳужумкор футболчи ўзи 2024 йилнинг ёзидан бери бирга шуғулланиб ва ўйнаб келаётган жамоадошлари орасида иккитасидан ҳайратланишини  айтди.

- Табиийки, менга жамоамиздагиларнинг барчаси ёқади. Лекин мен улар орасида мени ҳайратга солиб келаётган иккитасининг номини айтишим мумкин. Бу Эрлинг Холанд ва Бернарду Силва.

Холланд масаласида ҳаммаси тушуниларли – бу унинг голлари. Мен ҳар доим у шунча кўп гол уришни осонлик билан уддалаётгани ҳақида бош қотириб юраман.

Бернардунинг эса, клуб тарихи билан уйғунлашиб кетган фаолияти ҳайратланарли даражада қадрли. У менга жуда кўп ёрдам беряпти, ўйинимни янада яхшилаш бўйича маслаҳатларини аяётгани йўқ, - деди Савио.

Савио аслида Бразилиянинг “Атлетико Минейро” клуби тарбияланувчиси ҳисобланади. Ҳужумкор футболчи 2022 йили Европага кўчиб ўтганидан кейин “Труа”, “ПСВ Эндховен” ва “Жирона”да тўп тепган. “Манчестер Сити” иқтидорли ўйинчини 2024 йилнинг ёзида “Труа”дан 25 миллион еврога трансфер қилган эди.

Ўтган ёз Англия Премьер-лигасининг яна бир вакили “Тоттенхэм” Савио сўраб, “Манчестер Сити”га икки бор мурожаат этди. Лекин “шаҳарликлар” ўйинчи бўйича 50 миллион ва 70 миллион евролик таклифларни қабул қилмади.