Саудия клуби Ямал учун мисли кўрилмаган пул таклиф қилди

Саудиянинг "Ал-Ҳилол" клуби Каталониянинг "Барселона" жамоаси ҳужумчиси Ламин Ямални ўз сафига қўшиб олишни мақсад қилган.

"Fichajes" нашрининг берган маълумотларига кўра, Саудия Арабистон клуби раҳбарияти 18 ёшли футболчини 400 миллион еврога сотиб олишга тайёр. Агар бу битим амалга ошса, у футбол тарихидаги энг қиммат трансфер бўлади. 

Айни вақтда Ямалнинг "Transfermarkt" порталида нархи 200 миллион еврога баҳоланмоқда. Ламининг "кўк-анорлилар" билан амалдаги шартномаси 2031 йилнинг ёзига қадар амал қилади.

Маълумот учун, испаниялик ҳужумчи жорий мавсум "Барселона" сафида жами 5 та ўйинда майдонга тушиб, 2 та гол киритган ва 4 та голли узатмани амалга оширган.