Ro‘ziqul Berdiev 6 ochkolik o‘yin oldidan o‘z fikrlari bilan o‘rtoqlashdi

Xabaringiz bor, ertaga Qarshining "Nasaf" jamoasi OChL 6-turi doirasida "Al-Vehdat"ga qarshi o‘yin o‘tkazadi. Mazkur bahs oldidan ikkala jamoa murabbiylari matbuot anjumanida ishtirok etdi. 

Quyida "ajdarlar" ustozi Ro‘ziqul Berdievning fikrlari bilan tanishib chiqishingiz mumkin. 

- Assalomu alaykum barchaga. Biz maqsadga juda ham yaqinmiz. Hammasi o‘zimizga bog‘liq. Shuning uchun ertangi o‘yinda muxlislarni xursand qilish uchun bor kuchimiz bilan maydonda to‘p tepamiz. 

- Yigitlar bilan gaplashdim. Ularning asosiy maqsadi keyingi bosqichga chiqish edi. Bunga juda ham yaqin turibmiz. Ularda hech qanday bosim va hayajon yo‘q. 

"Al-Vehdat" "Nasaf" kabi ochiq o‘yin ko‘rsatadi. Bu "ajdarlar" uchun qanchalik qulay? 

- To‘g‘ri aytdingiz. "Nasaf" va "Al-Vehdat"ning o‘xshash tomonlari bor. Ikki jamoada ham yulduz futbolchi yo‘q. Ular ancha kurashuvchan va jismonan yaxshi holatdagi jamoa. Ertangi o‘yin qiziq bo‘ladi. G‘alaba qozonish oson bo‘lmaydi. Shuningdek, "Al-Vehdat" tarkibidagi futbolchilar bir-biri bilan ancha yillardan beri birga to‘p tepmoqda va ular bir-birlarini maydonda yaxshi tushinishadi. Biroq biz bu jamoani etarlicha o‘rgandik va ertangi uchrashuvga to‘liq tayyormiz.