Роналду "Манчестер Юнайтед" учун катта йўқотиш

"Манчестер Юнайтед"нинг собиқ ҳимоячиси Рио Фердинанд ҳужумчи Криштиану Роналдунинг "қизил иблислар" сафини тарк этиш истаги ҳақида фикр билдирди. Унинг фикрича, 37 ёшли португалияликнинг кетиши манкунианликларни қийин ҳолатда қолдиради.

“Албатта, Роналду “Манчестер Юнайтед”да қолади! У кетса, клубни оғир аҳволда қолдиради. Бу — катта муаммо! Роналду Манчестерни тарк этса, клуб трансфер бозорида 20 та гол ура оладиган ҳужумчини қаердан топади? Агар улар Криштиануни сотишса, кимни харид қилишади? "Манчестер Юнайтед" Роналдуни таркибда сақлаб қола олмаса, 20 та голдан қуруқ қолади”, — дея Фердинанднинг сўзларини келтиради “The Sub” нашри.

Ўтган мавсум Роналду “Манчестер Юнайтед”нинг барча мусобақалари доирасидаги 39 та ўйинда майдонга тушиб, ўз ҳисобига 24 та гол ва 3 та голли узатмани ёздириб қўйган. Ҳужумчининг клуб билан шартномаси 2023 йилнинг 30 июнига қадар мўлжалланган.