"Рома" Санчони эмас, "Челси" ҳужумчисини олиб келади

Жейдон Санчо мазкур трансферлар ойнасида "Рома"га ўтмайди.

Жанлука Ди Марционинг хабар беришича, Рим клуби спорт директори Фредерик Массара "Манчестер Юнайтед" ҳужумчиси вакили Эмека Обаси билан учрашиш учун Лондонга учиб келган. Рим клуби муқобил номзод сифатида "Челси"нинг 19 ёшли футболчиси Тайрик Жоржни кўриб чиқмоқда. Унинг манфаатларини ҳам Обаси ҳимоя қилади.

Сешанба кунги учрашувда Санчо томони римликларга узил-кесил рад жавобини берган. Шу билан бирга, Жорж "Рома"га қўшилишга рози, аммо ижара асосида эмас.

Италияликлар "Челси" футболчисининг тўлақонли трансферини расмийлаштиришга тайёр ва у ҳамда Лондон клуби билан келишувга эришиш устида ишламоқда. Массара Буюк Британия пойтахтида қолган бўлиб, яқин соатлар ичида музокараларда ижобий натижага эришишни умид қилмоқда.