“Реал” суперюлдузини Англиянинг уч гранди талашяпти

Mundo Deportivo нашрининг маълум қилишича, “Реал” ҳужумкор футболчиси Родриго Гоэс ёзги трансферлар даврида Англия Премьер-лигасига кўчиб ўтиши мумкин.

Бразилиялик юлдузни “Ливерпуль”, “Манчестер Сити” ва “Манчестер Юнайтед” ўз таркибига қўшиб олиш учун “Реал”даги вазиятни кузатиб бормоқда.

Якунланаётган мавсумда Килиан Мбаппе, Винисиус Жуниор ва Жуд Беллингем каби етакчи ўйинчилар соясида қолиб кетган Родригонинг ўзи ҳам муҳитни ўзгартириш борасида бош қотирмоқда.

Манбага кўра, Родриго жамоага янги бош мураббий келишини кутмоқда. У янги устоз билан таркибдаги ўрни ва жамоадаги келажаги ҳақида гаплашиб олмоқчи.  

Англия грандлари Родриго трансферини футболчи “Реал”дан кетишга қарор қилгандагина амалга оширишга уриниб кўриши айтилмоқда.