“Реал” Ҳусановнинг жамоадошини олиб кетмоқчи

“Манчестер Сити” таркибни ёшартириш сиёсатини бошлаб юборган. Бу жараёнда ёши ўттиздан ўтган футболчиларнинг ўрнига истеъдодли навқирон ижрочилар олиб келинади.

Шу сабабдан 30 ёшли Бернарду Силванинг номи ҳам клубдан кетадиганлар орасида тилга олинмоқда.

Defensa Central нашрининг ёзишича, португалиялик ҳужумкор футболчи атрофидаги вазиятни “Реал” жиддий тарзда кузатиб боряпти.

Силванинг “шаҳарликлар” билан амалдаги шартномаси якунланишига бир йил қолганини инобатга олган мадридликлар тажрибали ўйинчини арзонроқ нархда қўлга киритишни режалаштирган.

“Қироллик клуби” мутасаддилари Бернарду Силва ярим ҳимоя чизиғини сезиларли даражада кучайтира олишига ишонмоқда.

Жорий мавсумда Силва барча турнирларда 40 та ўйин ўтказиб, ўз ҳисобига учта гол ва тўртта ассист расмийлаштирди. Transfermarkt портали бу футболчини 45 миллион еврога баҳоламоқда.