"Рақибни ҳайрон қолдиришга ҳаракат қиламиз" - "Ал-Халдия" ва "Андижон" ўйинидан олдинги матбуот анжумани

5 ноябрь куни бўлиб ўтадиган “Ал-Халдия” - “Андижон” жамоалари ўртасидаги беллашув “Ал-Муҳаррақ” стадионида бўлиб ўтади.

Ўйин олдидан одатдагидек матбуот анжумани ташкил этилди. Унда дастлаб "Андижон" устози Максим Шацких ва футболчи Усмонали Исмоналиев иштирок этиб, ўз фикрларини билдириб ўтдилар.

- Бу ўйинга қандай тайёргарлик кўрилди?

Максим Шацких: - Ҳаммага хайрли кеч. Бу учрашувга ҳар доимгидек - чемпионат ва ОЧЛ баҳсларидаги тайёргарлик каби ҳозирлик кўрдик. Мен ишонаманки, ҳамма турнир жадвалидаги ҳолатни билади. Ушбу учрашув муҳимлигини ҳам билиб турибмиз. Биз жиддий тайёргарлик кўрдик ва тайёрмиз. Қанақа натижа бўлишини эртага ўйиндан кейин кўрамиз.

Усмонали Исмоналиев: - Бу рақиб билан ўйнаганимизга ҳали кўп бўлмади. Биринчи учрашувда иккала жамоа бир-бирини яхши ўрганди, деб ўйлайман. Худо хоҳласа, яраша тайёргарлик кўриб келдик. Бекордан-бекорга келганимиз йўқ. Бу оддий учрашув эмас. Насиб бўлса, уч очко билан қайтишга ҳаракат қиламиз. Мураббийларни кўрсатмаларини тўлиқ бажарсак, уйга ғалаба билан қайтамиз.

Шунингдек, матбуот анжуманининг иккинчи қисмида мезбонлар бош мураббийи Али Ашур ва футболчиси Махди Абдулажжабор қатнашишди.

- Биз эртага қандай муҳим ўйинлиги билиб турибмиз. Сиз мураббий сифатида ушбу учрашувдан нима кутяпсиз?

Али Ашур: - Бу ўйинни ҳурмат қиламиз. Гуруҳдаги тўртта жамоада кейинги босқичга чиқиш имконияти бор. Биз жамоамизни тактик томондан яхши тайёрладик. Тўртта баҳсни ўтказдик, бу бешинчи учрашувимиз. “Андижон”га қарши қўлимиздан келганича энг яхши ўйинимизни кўрсатиб, уч очко олишга ҳаракат қиламиз. Мухлисларимизни хурсанд қилишга интиламиз.

Махди Абдулжаббор: - Биз учун жиддий ўйинлигини биламиз. “Андижон” жамоасига қарши ўтган олдинги ўйинимизни таҳлил қилиб, хатоларимизни ўрганиб чиқдик ва камчиликларимизни йўқотиш устида ишладик. Уч очкони қўлга киритиб, кейинги босқичга чиқиш мақсадимиз бор.  

- Гуруҳда кучли рақобат бор. Ҳар бир ўйин финалдек муҳим. Бу учрашувдаги ғалаба жамоангизга кейинги босқичга чиқиш имкониятини оширади. Бўлажак ўйинда бутун маҳоратингизни кўрсатишга тайёрмисиз?

Али Ашур: - Албатта. “Ал-Халдия” Баҳрайндаги энг катта клубларидан бири. Биз чемпион бўлганмиз. Ҳар бир ўйинга бор имконият ва кучимизни сарфлаймиз. “Андижон”га қарши учрашув жуда муҳимлигини билиб турибмиз. Эртага ҳужумкор футбол кўрсатамиз ва рақибни ҳайрон қолдиришга ҳаракат қиламиз.