"Paxtakor" Derdiyokdan qutulmoqchi...

“Paxtakor”da kim qancha daromad topishi endi barchaga ma’lum. Bu ma’lumotning keng ommaga e’lon qilinishi albatta hech kimni befarq qoldirmadi. Ayniqsa, klubning shveytsariyalik hujumchisi Eren Derdiyokning yillik maoshi 1,3 million evroni tashkil qilishiga deyarli barcha o‘z munosabatini bildiryapti.

O‘tgan yili “Paxtakor”ga qo‘shilgan bu hujumchi hali o‘z so‘zini ayta olmagan. Ishonchni oqlay olmayotgan legionerning klubdan katta pul olayotgani turli gap-so‘zlarga sabab bo‘layotgani rost.

Yaqinda “Paxtakor” klubi sport direktori Ja’far Irismetov sports.uzga bergan intervyusida Derdiyokning transferi o‘zini oqlamagani haqida ochiq gapirgandi. Kuni kecha “Paxtakor” futbolchilarining maoshlari haqidagi ma’lumot e’lon qilingach, Eren Derdiyokning jamoadagi keyingi taqdiri borasida savollar tug‘ila boshladi.

Ma’lumotlarga qaraganda, “Paxtakor” shveytsariyalik hujumchi bilan xayrlashmoqchi. Vaziyatga oydinlik kiritish uchun Ja’far Irismetovga yuzlanganimizda u shunday dedi: “Derdiyok bilan hali shartnoma bekor qilinmadi, ammo bu borada muzokaralar olib borilyapti. Uning kelajagi hali so‘roq ostida”.

Bundan chiqdi, kam gol urayotgan Derdiyok “Paxtakor”da o‘z manziliga etib kelayotganga o‘xshaydi. Voqealar rivojini kuzatishda davom etamiz.