"Ўзимизни оқлаш ниятимиз йўқ" - Алиқулов жамоасининг йирик ҳисобдаги мағлубиятидан сўнг яна нималарни айтди?

Суперлиганинг 10-туридан ўрин олган “Хоразм” – “Машъал” беллашувида урганчликлар 3:0 ҳисобида ғалаба қозонди ва рақибини ҳар томонлама мағлубиятга учратди.

Муборакликлар “Хоразм”га қарши беллашувда ўзидан кутилган ўйинни намойиш қила олмади.

Беллашувдан кейин ташкил қилинган матбуот анжуманида “Машъал” бош мураббийи Асрор Алиқулов ўз фикрлари билан ўртоқлашди.

- Ўйинни ёмон бошладик. Стандарт ҳолатларга эътибор қаратишимиз керак эди. Футболчилар сусткашликка йўл қўйди, тўп ўтказиб юбордик. Ўйинга киришишга ҳаракат қилдик. Яна тезкор иккинчи голни олиб чиқдик. Кейинчалик ўз ўйинимизни топишга қийналдик. Ўзимизни оқлаш ниятимиз йўқ. Узоқ йўл босиб келган мухлисларимиз учун ўйнашимиз керак эди. Вазиятни ўнглашга ҳаракат қилдик. Афсус, йирик ҳисобда мағлуб бўлдик.

- Дилшод Раҳматуллаевнинг ўйини ҳақида. У ўйинни кучайтира олди. Футболчининг жисмоний ҳолати учрашувни тўлиқ ўтказишга ёрдам бермайдими?

- Дилшодни Кубок учрашувида ҳам ўйнатгандик. Бу ўйинга киришиб кетиш осон эмасди. Аммо ҳаракат қилди. Биринчи бўлимдан ўйинни бошлаган пайтлари ҳам бўлган. Ўртада тезкор футболчи етишмаяпти. Шунинг учун бошқа ўйинчиларга имконият беряпмиз. Кейинги учрашувларга қараймиз, бу ҳолатдан чиқиб кетиш учун Дилшод ҳам асосий таркибда ўйинни бошлаши мумкин.

- Натижани ҳисобга олмаганда ўйиндан қониқиш ҳосил қилдингизми?

- Ҳужум қилишга ҳаракат қилдик. Умумий олганда, футболчиларга кўпроқ характер етишмади. Охиригача курашиш, керакли пайтда тезлик қўшиш...Қисқа қилиб айтганда, бу беллашувда тажовузкорлик етишмади. Айнан ўйинчиларимизга тажовузкорлик етишмаганидан кўп ҳужумларимиз охирига етмай қолди. 3:0 ҳисобида ютқаздик, умуман қониқиш ҳосил қилганимиз йўқ. Мухлисларимиз олдида узр сўраймиз.