Ўзи ишламоқчимисан? Зидан яна бир супертаклифни қабул қилмади

Франциялик собиқ футбол юлдузи Зинедин Зидан мураббийликни ҳам жуда яхши уддалашини “Реал”ни икки марта бошқариш орқали исботлаб қўйган.

Бироқ Зинедин Зидан 2021 йили Мадрид клубини тарк этганидан бери ишсиз юрибди. Ҳар мавсум Европанинг қудратли клублари уни ҳамкорликка таклиф қилади.

Яқинда Жозе Моуриньони бош мураббийликдан истеъфога чиқарган “Фенербаҳче” раҳбарияти Зинедин Зиданни жамоани бошқаришга чорлади.

Mundo Deportivo нашрининг маълум қилишича, франциялик мутахассис Туркияда ишлаш вариантини қабул қилмаган. Зидан Франция терма жамоасига устозлик қилишни истаяпти.

Манбага кўра, Зидан бир неча ойдан бери Франция футбол федерацияси ва миллий терма жамоа фаолиятини таҳлил қилиб келмоқда ва Дидье Дешамдан кейин унинг ўрнини эгаллашга тайёргарлик кўрмоқда.

Зинедин Зидан  2016-2018 ва 2019-2021 йиллар давомида “Реал”ни бошқариб, уч марта Европа Чемпионлар лигасида ғолиб чиққан, икки мартадан Испания чемпиони ва мамлакат Суперкубогида зафар қучган .