Oxirgi turlarga kelib, muxlislar uchun Superliga qiziq bo‘lmay qoldi. Ishqibozlar futbolimizda tasodiflar bo‘lishiga ishonmaydi chog‘i

22-24 noyabr kunlari Superligada 25-tur bahslari o‘tkazildi. Natijalar bilan saytimiz orqali xabar berib bordik.

Ushbu turda bir qator qiziqarli o‘yinlar, o‘ziga xos qarama-qarshiliklar kuzatildi.

Superliga bilan xayrlashgan “Buxoro” o‘z uyida imkoniyatni boy berdi. Mavsumni qoniqarsiz o‘tkazgan OKMK doimgidek oxirida jonlanib, sovrinli o‘rinlarga da’vogarlik qilmoqda. “Turon” Yaypanda engildi va u ham ligani rasman tark etishi aniq bo‘ldi. 

“Bunyodkor” “Metallurg”ni, “Neftchi” “Qizilqum”ni taslim etdi. Endi navoiyliklar o‘tish bahsida “Qo‘qon-1912” bilan kuch sinashadi. Bellashuv 5 dekabr sanasida “Qo‘qon-1912” maydonida bo‘lib o‘tadi.

“So‘g‘diyona” Qarshida durang o‘ynadi. “Navbahor” esa “Olimpik”ka yutqazdi. Bu orqali jizzaxliklar Berdiev jamoasini, Kapadze shogirdlari “lochinlar”ni chempionlik poygasidan chiqarib yubordi. Bundan foydalangan “Paxtakor” bir tur qolganda “Surxon”dan 3 ochko olib, chempionlikka erishdi. 

Endi esa turga oid qiziqarli ma’lumotlarni taqdim etamiz. Ya’ni an’anamizga sodiq qolgan holda tur muxlislari statistikasi bilan tanishtiramiz.

25-turda stadionlarimizga jami 21136 tomoshabin tashrif buyurdi. Bu har bir bellashuvga o‘rtacha 3019ni tashkil qiladi.

Aytsak ishonmaysiz, eng ko‘p muxlis Toshkentda. “Surxon” - “Paxtakor” o‘rtasidagi o‘yinni 6063 tomoshabin arenadan kuzatgan. Bu o‘yinning ahamiyati ancha yuqori edi. Chunki “sherlar”ning yaqin ta’qibchilari ochko yo‘qotganidan kelib chiqib, “Paxtakor” durang o‘ynasa ham chempionga aylanardi. Ammo Shatskix shogirdlari g‘alaba qozonib, yana kubokni boshi uzra baland ko‘tardi.

“Nasaf” - “So‘g‘diyona” o‘rtasidagi turning markaziy uchrashuvlaridan biriga 2752 ishqiboz tashrif buyurdi. Nursiz durang qayd etilgan bellashuvga qiziqish haminqadar edi. Ammo yakunda…

Eng kam tomoshabin ham poytaxtda. “Bunyodkor”ning “Metallurg”ga qarshi uchrashuvini tomosha qilish uchun 315 kishi stadionga keldi.

Bu raqamlar shundan dalolat beradiki, Superliganing oxirgi turlari muxlislar uchun qiziq bo‘lmay qolgan. To‘g‘ri, chempion nomi deyarli aniq edi. Ammo amalda imkoniyat borligi ham fakt edi. Lekin ishqibozlar bizning futbolda tasodiflar bo‘lishiga ishonmaydi chog‘i.

Quyida Superliganing ushbu turiga tashrif buyurgan muxlislar statistikasi bilan tanishing (muxlislar soni PFL saytidan olindi):

“Surxon” - “Paxtakor” 1:2. 6063

“Neftchi” - “Qizilqum” 1:0. 5866

“Buxoro” - OKMK 0:1. 2971

“Nasaf” - “So‘g‘diyona” 0:0. 2752

“Turon” - “Andijon” 1:3. 2316

“Olimpik” - “Navbahor” 2:1. 853

“Bunyodkor” - “Metallurg” 1:0. 315