Olimpiada yakunlandi, endi navbat Paralimpiya o‘yinlariga!

Bugun "Tokio-2020" yozgi Olimpiya o‘yinlari o‘z yakuniga etdi. Sayyoramizning 206 ta mamlakatidan 12 500 nafarga yaqin atlet g‘oliblik uchun kurash olib bordi.

O‘zbekiston delegatsiyasi 3 ta oltin va 2 ta bronza medali bilan yakunda umumjamoa hisobida 32-o‘rinni egalladi.

Endi oradan sanoqli kunlar o‘tgach, aniqrog‘i 24 avgust kuni Tokio shahrida XVI yozgi Paralimpiya o‘yinlari start oladi. Unda sayyoramizning turli hududlaridan kelgan 5 mingga yaqin para atlet 540 ta medallar to‘plami uchun kurash olib boradi.

Shu o‘rinda aytib o‘tish lozim, o‘zbekistonlik paralimpiyachilar Paralimpiya o‘yinlarida ilk bor 8 ta sport turidan musobaqalarda ishtirok etadi.

Bundan avval, "Rio-2016" yozgi Paralimpiya o‘yinlarida paralimpiyachilarimiz 5 ta sport turidan bahslarda qatnashgan va 32 ta sportchi 31 ta medalga sazovor bo‘lgan holda umumjamoa hisobida 16-o‘rinni qo‘lga kiritgan.