МЮ франциялик ёш ҳужумчини нишонга олди

"Манчестер Юнайтед" "Айнтрахт"нинг 22 ёшли ҳужумчиси Уго Экитикега қизиқиш билдирмоқда. Бу ҳақда журналист Флориан Плеттенберг хабар берди.

Манба маълумотларига кўра, Франкфурт клуби келгуси ёзда франциялик футболчини 80 миллион евролик таклиф олинган тақдирда қўйиб юборишга тайёр. Шунингдек, "қизил иблислар" ҳужумчи Беньямин Шешконинг эҳтимолий трансфери бўйича "РБ Лейпциг"га ҳам мурожаат қилган. "Буқалар" 21 ёшли футболчини 70 миллион еврога баҳоламоқда.

Жорий мавсумда Экитике барча турнирларда 38 та ўйинда иштирок этиб, 19 та гол урди ва 8 та голли узатмага муаллифлик қилди.

Маълумот учун, футболчининг клуб билан амалдаги шартномаси 2029 йилнинг ёзигача мўлжалланган. Transfermarkt сайти маълумотларига кўра, футболчининг қиймати 40 миллион еврони ташкил этади.