Muhsin Muxammadiev qo‘l ostidagi "Buxoro"ning natijalari bilan tanishamiz

"Buxoro" klubi bosh murabbiyi Muhsin Muxammadiev shu yilning 9 iyun kuni jamoa ustoziga aylangan edi.

Mutahassis jamoani umumiy 10 ta rasmiy uchrashuvida ishladi. Natijalar esa ko‘ngildagidek emas.

To‘plar nisbatiga e’tibor bersak, katta tafovutni ko‘rishimiz mumkin. 10 ta bahsda bor-yo‘g‘i 6 ta gol urgan Muxammadiev shogirdlari o‘z darvozasidan 28 ta to‘p olib chiqdi. Jamoaga asosan "Paxtakor" va "Andijon" klublari raqiblik qildi. Ushbu ikki klub buxoroliklarga 3 martadan raqiblik qilishdi.

"Navbahor" klubi esa, 2 marotaba Muxammadiev boshchilik qilayotgan klubga qarshi maydonda bahs olib bordi. "So‘g‘diyona" va "Qo‘qon-1912" klublari bir marotabadan raqiblik qilishdi.

Superliganing 7 ta, O‘zbekiston kubogining 1 ta va Liga kubogining 2 ta bahsida "Buxoro"ni maydonga boshlab tushgan Muxammadievning ilk bellashuvi 16 iyun kuniga to‘g‘ri keladi.

Ushbu sanada, o‘z maydonida "Paxtakor"ni qabul qilib, yirik 0:5 hisobida mag‘lubiyatga uchragan.

Oradan 3 kun o‘tib, O‘zbekiston Kubogi doirasida "Andijon" mexmoni bo‘lgan buxoroliklar 4:1 hisobida yutqazib qo‘yishgan va musobaqani tark etishdi.

23 iyun kuni Namanganga safar qilib, jamoa navbatdagi mag‘lubiyatini qabul qilib oldi. "Navbahor" - "Buxoro" 3:1.

Nihoyat, Muhsin Muxammadiev shogirdlari g‘alaba qozonishga erishdi. 29 iyunda, Superliga birinchi davrasining yakuniy bellashuvi bo‘lib o‘tdi. Unga ko‘ra, "Andijon" bilan o‘tgan bahsning taqdirini yagona gol hal qildi.

Davralar oralig‘ida Liga Kubogi bahslari bo‘lib o‘tdi. Guruhning ikkinchi, uchinchi turlarida "Buxoro"ga "Paxtakor" va "Qo‘qon-1912" jamoalari raqiblik qilishdi. Toshkentliklarga 1:2 va qo‘qonliklarga yirik 6:1 hisobida yutqazib qo‘yishdi.

27 iyul kuni, Superliga ikkinchi davrasining ilk turida "Andijon"ga safar qilgan ko‘hna shaxar jamoasi alamli tarzda 2:0 hisobi bilan mag‘lub bo‘lishdi.

Chempionatimizning 15-turiga kelib, jamoa ochko qo‘lga kiritdi. Bu safar, "Navbahor" klubini qabul qilib, nursiz durang(0:0) natija qayd etishdi.

Bosh murabbiy debyutida "Paxtakor"ga 0:5 hisobida mag‘lub bo‘lgan edi. 10 avgust sanasida ham, "Buxoro" darvozasiga "sherlar" javobsiz 5 ta gol urishdi.

Bugun, ya’ni 17 avgustda, Jizzaxning "So‘g‘diyona" jamoasini qabul qilgan buxoroliklar navbatdagi ochkoni qo‘lga kiritishdi. Muxammadiev jamoasi jizzaxliklar bilan 1:1 hisobini qayd etishdi.

Ko‘rib turganingizdek Muhsin Muxammadiev boshchiligidagi "Buxoro" klubi bor-yo‘g‘i 1 marotabagina g‘alaba qozona oldi. Shu qatorda, 2 ta durang va 7 ta mag‘lubiyat ham bor.

Buxoroliklar O‘zbekiston Kubogi va Liga Kubogi musobaqalarini tark etishga ulgurishgan va Superliganing eng so‘nggi pog‘onasidan o‘rin olib turishibdi.

Muxammadiev boshchiligida "Buxoro"ning rasmiy o‘yinlari:

Superliga.

16.06.2019. "Buxoro" - "Paxtakor" 0:5.

23.06.2019. "Navbahor" - "Buxoro" 3:1.

29.06.2019. "Buxoro" - "Andijon" 1:0.

27.07.2019. "Andijon" - "Buxoro" 2:0.

31.07.2019. "Buxoro" - "Navbahor" 0:0.

10.08.2019. "Paxtakor" - "Buxoro" 5:0.

17.08.2019. "Buxoro - "So‘g‘diyona" 1:1.

Liga Kubogi.

03.07.2019. "Buxoro" - "Paxtakor" 1:2.

07.07.2019. "Qo‘qon-1912" - "Buxoro" 6:1.

O‘zbekiston Kubogi.

19.06.2019. "Andijon" - "Buxoro" 4:1.