Модричга зўр клуб чиқди

Клублар ўртасидаги жаҳон чемпионатидан кейин “Реал”ни буткул тарк этадиган Лука Модрич фаолиятини давом эттиришга қарор қилди.

39 ёшли плеймейкер 2026 йилги жаҳон чемпионатида Хорватия терма жамоаси шарафини ҳимоя қилишни режалаштириб қўйган.

Испания матбуоти тажрибали ўйинчи Мадриддан кўчиб нияти йўқлигини ва янги иш жойи сифатида пойтахтда жойлашган “Хетафе” ва “Райо Вальекано”ни танлаши мумкинлигини ёзмоқда.

Бироқ янги маълумотларга кўра, Италиянинг энг қудратли клубларидан бири “Интер” хорватиялик футболчига иш беришга тайёр. Бироқ миланликлар бу масалани Европа Чемпионлар лигаси финалидан кейин ҳал қилмоқчи.

“Интер” 31 май куни Мюнхен шаҳрида “Пари Сен-Жермен”га қарши қитъанинг энг нуфузли турнирида финал учрашувини ўтказади.

Лука Модричга 2026 йилги жаҳон чемпионатига мезбонлик қиладиган уммонорти клубларидан ҳам чорлов бўляпти. Манбага кўра, тажрибали ярим ҳимоячининг ўзи келажагини клублар ўртасидаги жаҳон чемпионатдан кейин ҳал қилмоқчи.