Мессининг умуман кераги бўлмайди!

“Барселона” президенти Жоан Лапорта “Пари Сен-Жермен” да ўйнаётган Лионель Мессини Каталонияга қайтармаслигини билдирди.

- Мен Мессидан ёки унинг атрофидагиларидан футболчининг Каталонияга қайтиш истаги акс эттирилган бирорта хабар олганим йўқ. Биз эндига ўз ишини бошлаган ёш жамоа қуряпмиз. Месси бу Месси, у дунёнинг энг зўр ўйинчиси, лекин биз уни ортга қайтармаймиз, - деди Жоан Лапорта.

Эслатиб ўтамиз, Лионель Месси ўтган йили ёзда молиявий фэйр-плей талаблари туфайли каталонияликлар билан янги шартнома туза олмаган эди. Шундан сўнг, ПСЖга кўчиб ўтган юлдуз Париж клубида ўзидан кутилган ўйинни намойиш қила олмаяпти.

34 ёшли ҳужумчи Франция чемпионатида 18 та ўйинда иккита гол уриб, 10 та голли пас оширди. Унинг амалдаги шартномаси 2023 йилнинг ёзида якунланади.